ဢေႇသၢမ်တူဝ်လႄႈ ၶူးသွၼ် (3As)

                        ၵၢၼ်ႁဵၼ်းၵၢၼ်သွၼ် လွၵ်းလၢႆးသွၼ် တွၼ်ႈတႃႇ လုၵ်ႈဢွၼ်ႇႁဵၼ်း တွၼ်ႈတႃႇ ၽူႈလဵပ်ႈႁဵၼ်း တေၶဝ်ႈၸႂ် ပႃးၸႂ်ၶဝ်ႈမႃးၼႂ်း ၽႃႇသႃႇ ၵၢၼ်သွၼ်တူဝ် ၸဝ်ႈၵဝ်ႇလႆႈလီလီၼၼ်ႉ ၶူးသွၼ်မၼ်းတေလႆႈ မီးၵၢၼ်ႁၢင်ႈႁႅၼ်းလႄႈ လွၵ်းလၢႆးၽႂ်လွၵ်းလၢႆးမၼ်းပႃးယူႇ။ ၸွမ်းၼင်ႇ လႆႈယၢမ်ႈႁၼ် လႆႈမီးတူဝ်ထူပ်းၺႃးမႃး ၶူးသွၼ်ၼိုင်ႈၵေႃႉ သင်မၼ်းဢမ်ႇမီးၵၢၼ်ႁၢင်ႈႁႅၼ်း ဢမ်ႇမီးလွၵ်းလႆၢးမႂ်ႇမႂ်ႇသင် တႃႇတေၶဝ်ႈ ႁွင်ႈႁဵၼ်းသေ မႃးသွၼ်ပၼ်လုၵ်ႈဢွၼ်ႇႁဵၼ်း ၽူႈလဵပ်ႈႁဵၼ်းၼႂ်းႁွင်ႈႁဵၼ်းၼၼ်ႉ လုၵ်ႈဢွၼ်ႇႁဵၼ်းၶဝ် တေၶၢၼ်ႉ တေၶႂ်ႈၼွၼ်း တေၵႆႉၵႆႉယွၼ်းဢွၵ်ႇၵႂႃႇတၢင်းၼွၵ်ႈ သွၼ်သင်ၵေႃႈ လုၵ်ႈဢွၼ်ႇႁဵၼ်းၶဝ်တေဢမ်ႇမီးလွင်ႈ ၸပ်းၸႂ်သင်ၸွမ်းၸိူဝ်းၼၼ်ႉယဝ်ႉ။

                        ၵွပ်ႈၼႆ ၵၢပ်ႈပၢၼ်ဝၼ်းမိူဝ်ႈၼႆႉ လွၵ်းလၢႆးသွၼ်လုၵ်ႈဢွၼ်ႇႁဵၼ်း ႁႂ်ႈလုၵ်ႈဢွၼ်ႇႁဵၼ်း ၶဝ်ႈၸႂ် ပႃးၸႂ် သူၼ်ၸႂ် ၼိူဝ်ၽႃႇသႃႇၵၢၼ်သွၼ်ၶူးၼၼ်ႉၵေႃႈ လမ်လွင်ႈ လွင်ႈယႂ်ႇတေႉတေႉ ယွၼ်ႉပိူဝ်ႈဝႃႈ ၵၢပ်ႈပၢၼ်ယၢမ်းလဵဝ်ၼႆႉ ICT ၵိုင်ႉၵၢင်ႉ ၶဝ်ႈမႃးႁႅင်းၼႃႇလႄႈ သင်လွၵ်းလၢႆးသွၼ်ၶူးသွၼ်ႁဝ်း ဢမ်ႇမီးလွင်ႈလီ သူၼ်ႇၸႂ် ႁဵတ်းႁႂ်ႈလုၵ်ႈဢွၼ်ႇႁဵၼ်း ပႃးၸႂ်ၶႂ်ႈႁဵၼ်းၼႆၸိုင်ႈ ဢမ်ႇႁိုင်သင် ၶူးသွၼ်ၵေႃႉၼၼ်ႉ မၼ်းတိုၼ်းတေ လႆႈႁူပ်ႉၺႃး လွင်ႈၶႅင်ႇတႃႉ တွၼ်ႈတႃႇမၼ်း ၶၢဝ်းတၢင်းၼႃႈယဝ်ႉ။

                        ၶူးသွၼ်ၼိုင်ႈၵေႃႉၼႆႉ မၼ်းတေလႆႈမီး ၵၢၼ်လဵပ်ႈႁဵၼ်းယူႇတႃႇသေႇ တေၶၢတ်ႇၵၢၼ်လဵပ်ႈႁဵၼ်းဢမ်ႇလႆႈ ပိူၼ်ႈသွၼ်သင် ပိူၼ်ႈႁဵတ်းႁိုဝ်သွၼ်လုၵ်ႈဢွၼ်ႇႁဵၼ်း ပိူၼ်ႈႁဵတ်းႁိုဝ်ပူၵ်းပွင် လုၵ်ႈဢွၼ်ႇႁဵၼ်း လွၵ်းလၢႆးသွၼ် ၵၢၼ်သွၼ်သမ်ႉ ပိူၼ်ႈႁဵတ်းႁိုဝ်သွၼ် လုၵ်ႈဢွၼ်ႇႁဵၼ်းႁဝ်းသမ်ႉ သူၼ်ၸႂ်လွင်ႈသင် ၶဝ်သမ်ႉၸွင်ႇပႃးၸႂ်ပႃးၶေႃး ၼႂ်းၵၢၼ်သွၼ် ၼိူဝ်ႁူဝ်ၶေႃႈၼႆႉ ၸိူဝ်းၼႆႉ ၶူးမၼ်းတေလႆႈ ထတ်းၸွမ်း (Investigate) ၵူႈၶၢဝ်းယၢမ်းယူႇ. သွၼ်ယဝ်ႉၵေႃႈယဝ်ႉယဝ်ႉ လုၵ်ႈဢွၼ်ႇႁဵၼ်း ပွင်ႇၸႂ်ဢမ်ႇပွင်ႇၸႂ် လုၵ်ႈႁဵၼ်းၶဝ်ႈၸႂ်ဢမ်ႇၶဝ်ႈၸႂ် လုၵ်ႈဢွၼ်ႇႁဵၼ်း ၶႂ်ႈသွၼ်ႁႃႉ ဢမ်ႇၶႂ်ႈသွၼ် ဢမ်ႇမီးၵၢၼ်ထတ်းတူၺ်းၸွမ်းသင်ၼႆတေႉ ၶူး လုၵ်ႈႁဵၼ်း ပႃးၸဵမ်ႁူင်းႁဵၼ်း မၼ်းတိုၼ်းဢမ်ႇၵဝ်ႉၼႃႈ။

                        တွၼ်ႈတႃႇ လုၵ်ႈဢွၼ်ႇႁဵၼ်း တေသူၼ်ၸႂ် ပႃးၸႂ် ၵျေႃႇသိူဝ်းၸွမ်း ၼႂ်းၽႃႇသႃႇ ၵၢၼ်သွၼ် ၶူးသွၼ်တေႃႇၵေႃႉၼၼ်ႉ တီႇဢေႇသုတ်းမၼ်း ၶူးသွၼ်တေႃႇၵေႃႉ တေလႆႈႁူႉ တေလႆႈမီး ဢေႇသၢမ်တူဝ်ၼႆႉ (3A) ၼႆႉယဝ်ႉ။ ၼၼ်ႉၵေႃႈပဵၼ်

1. Actively (လွင်ႈတူင်ႉတိုၼ်ႇ)
2. Attractive (လွင်ႈၸၼ်ၸႂ်)
3. Action Plan (ၽႅၼ်ၵၢၼ် လွင်ႈတူင်ႉၼိုင်)

                        သၢမ်လွင်ႈၼႆႉ မၼ်းလွင်ႈယႂ်ႇ တွၼ်ႈတႃႇ ၶူးသွၼ်မၼ်းတေႉတေႉ သင်ဢမ်ႇမီး (3) လွင်ႈၼႆႉ လုၵ်ႈဢွၼ်ႇႁဵၼ်း ဢၼ်မီးၼႂ်းႁွင်ႈႁဵၼ်း ၼၼ်ႉၵေႃႈ တိုၼ်းတေဢမ်ႇသူၼ်ၸႂ်သင်လႄႈ ဢမ်ႇၶႂ်ႈႁဵၼ်းလိၵ်ႈသင်လႃးလႃး။

• Actively (လွင်ႈတူင်ႉတိုၼ်ႇ)

                        တႃႇလုၵ်ႈဢွၼ်ႇႁဵၼ်း ၽူႈလဵပ်ႈႁဵၼ်းတေပႃးၸႂ် သူၼ်ႇၸႂ်မႃးၼိူဝ်ၽႃႇသႃႇၵၢၼ်သွၼ်တူဝ်ၸဝ်ႈၵဝ်ႇ ဢၼ်တူဝ်ၸဝ်ႈၵဝ်ႇလႆႈယိပ်း လႆႈသွၼ်လုၵ်ႈဢွၼ်ႇႁဵၼ်းၼၼ်ႉ ထီႉၼိုင်ႈ ၶူးသွၼ်မၼ်းလူဝ်ႇမီးလွင်ႈတူင်ႉတိုၼ်ႇ ၶႂ်ႈႁဵၼ်းၶႂ်ႈသွၼ်ပၼ် လုၵ်ႈႁဵၼ်းႁၢဝ်ႉႁၢဝ်ႉႁႅင်းႁႅင်းဢွၼ်တၢင်းၵွၼ်ႇ ပေႃးဢမ်ႇၼၼ် လုၵ်ႈဢွၼ်ႇႁဵၼ်းတေၶၢတ်ႉလႄႈ တေဢမ်ႇၶႂ်ႈသွၼ်လိၵ်ႈ ၼႂ်းႁွင်ႈႁဵၼ်း။

                        ၶူးသွၼ်မၼ်းၶဝ်ႈၵႂႃႇၼႂ်းႁွင်ႈႁဵၼ်းယဝ်ႉ ဢမ်ႇမီးလွင်ႈတူင်ႉတိုၼ်ႇသင် ၵႂႃႇၼင်ႈငဝ်ႈယူႇ ၼႄၾၢင်ႈႁၢင်ႈၶၢၼ်ႉတေႃႇလုၵ်ႈဢွၼ်ႇႁဵၼ်း ၶၢင်းပွင်ႉတေႃႇလုၵ်ႈဢွၼ်ႇႁဵၼ်း လၢတ်ႈလွင်ႈယၢပ်ႇၽိုတ်ႇၶူးသွၼ်ၼႄလုၵ်ႈဢွၼ်ႇႁဵၼ်း ဢမ်ႇမီးလွင်ႈတူင်ႉတိုၼ်ႇသင်ၼႆၸိုင် ၼႄႉၼွၼ်း လုၵ်ႈဢွၼ်ႇႁဵၼ်းၼႂ်းႁွင်ႈႁဵၼ်းၼၼ်ႉၵေႃႈ တေၶၢၼ်ႉလႄႈ ဢမ်ႇသူၼ်ၸႂ်ၵၢၼ်သွၼ်သင်။ ယွၼ်ႉၼၼ် ဢေႇမၢႆၼိုင်ႈၼႆႉ ၶူးသွၼ်မၼ်းတေလႆႈမီး လွင်ႈတူင်ႉတိုၼ်ႇ ၼႂ်းႁူဝ်ၶေႃႈၽႃႇသႃႇ ၵၢၼ်သွၼ်တူဝ်ၸဝ်ႈၵဝ်ႇၼၼ်ႉ ဢွၼ်တၢင်း လႄႈ လူဝ်ႇၶိုၼ်းမႄးပူၵ်းတိုၼ်ႇၸႂ်လုၵ်ႈဢွၼ်ႇႁဵၼ်း ႁႂ်ႈၶဝ်ပေႃးမီး လွင်ႈတူင်ႉတိုၼ်ႇမႃး ၸွမ်းၼႂ်းၽႃႇသႃႇၵၢၼ်သွၼ်တူဝ်ၸဝ်ႈၵဝ်ႇၼၼ်ႉပႃးၸွမ်းလီလီၼၼ်ႉယဝ်ႉ သင်ႁဝ်းဢမ်ႇ ႁဵတ်းလႆႈလွင်ႈၼႆႉၸိုင် လုၵ်ႈဢွၼ်ႇႁဵၼ်းတေဢမ်ႇၶႂ်ႈသွၼ်လိၵ်ႈလႄႈ တေဢွၼ်ၵၼ်ၶၢၼ်ႉ လိုၼ်းသုတ်း ၶူးသွၼ်မၼ်း ၸၢင်ႈလႆႈ သုၵ်ႉၸႂ်လႄႈ ႁႆႈသေဢွၵ်ႇၼွၵ်ႈႁွင်ႈႁဵၼ်းမႃးၵေႃႈၸၢင်ႈပဵၼ်လႆႈ။                        

• Attractive (လွင်ႈၸၼ်ၸႂ်)

                        ၽႃႇသႃႇၵၢၼ်သွၼ် ၶူးသွၼ်တေႃႇၵေႃႉ ဢၼ်လႆႈယိပ်းဝႆႉ ဢၼ်တေၶဝ်ႈၵႂႃႇသွၼ်လုၵ်ႈဢွၼ်ႇ ၼႂ်းႁွင်ႈႁဵၼ်းၼၼ်ႉ လူဝ်ႇမီးလွင်ႈၶိူင်ႈၵမ်ႉၵႅမ်သင်ၼႆၵေႃႈ တေလႆႈဝူၼ်ႉ တေလႆႈႁၢင်ႈႁႅၼ်းသေ ႁႂ်ႈမၼ်းမႃး ၵွင်ႉၵၢႆႇၵၼ်တၢင်း ႁူဝ်ၶေႃး ၽႃႇသႃႇ ၵၢၼ်သွၼ်တူဝ်ၸဝ်ႈၵဝ်ႇလႆႈလီ ၵႂႃႇလႆႈလီၼၼ်ႉ ၶူးသွၼ်မၼ်းတေလႆႈ ဝၢင်းၽႅၼ်လႄႈ ႁဵတ်းသၢင်ႈ ႁႂ်ႈပေႃးမီးလွင်ႈၸၼ်ၸႂ် ႁႂ်ႈလုၵ်ႈဢွၼ်ႇႁဵၼ်း ပေႃးၶႂ်ႈႁဵၼ်း ၶႂ်ႈသွၼ်ဢဝ် ၽႃႇသႃႇ တူဝ်ၸဝ်ႈၵဝ်ႇၵႂႃႇၼႆႉလီလီယူႇ။

                        ၵၢၼ်သွၼ်ၽႃႇသႃႇသင်ၵေႃႈလီ ႁူဝ်ၶေႃႈသင်ၵေႃႈယဝ်ႉ သင်ၶူးသွၼ်မၼ်း ႁဵတ်းႁႂ်ႈလုၵ်ႈဢွၼ်ႇႁဵၼ်း ပႃးၸႂ်ၶဝ်ႈၸႂ်သူၼ်ၸႂ်လႆႈၵေႃႈ ၶူးသွၼ်မၼ်း တိုၼ်းဢမ်ႇႁိုဝ်ႉလႄႈ လုၵ်ႈဢွၼ်ႇႁဵၼ်းၶဝ်ၵေႃႈ သင်ၶိင်ႇၶူးသွၼ်ၵေႃႉၼၼ်ႉယဝ်ႉၵႂႃႇသေတႃႉၷေႃႉ တိုၵ်ႉဢွၼ်ၵၼ်ၶႂ်ႈႁဵၼ်းသွၼ်ဢဝ် ၽႃႇသႃႇၶူးသွၼ်ၼၼ်ႉတႃႇသေႇယဝ်ႉ။ တႃႇလုၵ်ႈဢွၼ်ႇႁဵၼ်း တေမီးလွင်ႈၸၼ်ၸႂ်မႃးၼိူဝ် ၽႃႇသႃႇတူဝ်ၸဝ်ႈၵဝ်ႇလႆႈလီၼၼ်ႉၵေႃႈ ၵေႃႉပဵၼ်ၶူးသွၼ်မၼ်း တေလႆႈႁၢင်ႈႁႅၼ်းလႄႈ ဝူၼ်ႉႁႃ လွၵ်းလၢႆးသွၼ်လုၵ်ႈဢွၼ်ႇဝႃႈ လုၵ်ႈဢွၼ်ႇတူဝ်ၸဝ်ႈၵဝ်ႇ ၼႂ်းႁွင်ႈႁဵၼ်းၼႆႉ ၶဝ်ၵျိုၵ်ႈသင် ၶဝ်လႆႈၸႂ်သင် တၼ်းတၼ်းသေဝၼ်းဝၼ်း လုၵ်ႈဢွၼ်ႇၼႂ်းႁွင်ႈႁဵၼ်းၼႆႉ ၶဝ်သူၼ်ၸႂ် လဵၼ်ႈဢီႇသင်ၼမ်သေပိူၼ်ႈ ပေႃးထိုင်ၶိင်ႇၶၢဝ်းလူင်းလဵၼ်ႈ လူင်းႁူင်းႁဵၼ်း လုၵ်ႈဢွၼ်ႇႁဵၼ်း ၼႂ်းႁွင်ႈႁဵၼ်းၼၼ်ႉ ၶဝ်ဢွၼ်ၵၼ်ႁဵတ်းသင်ယူႇ ၼႆၵေႃႉပဵၼ်ၶူးသွၼ်မၼ်း တေလႆႈၵဵပ်းၶေႃႈမုၼ်းယဝ်ႉ ႁၢင်ႈႁႅၼ်း ၽႃႇသႃႇၵၢၼ်သွၼ် တူဝ်ၸဝ်ႈၵဝ်ႇၵႂႃႇယူႇ။

• Action Plans (ၽႅၼ်ၵၢၼ်လွင်ႈတူင်ႉၼိုင်)

                        လွင်ႈတူင်ႉတိုၼ်ႇၵေႃႈမီးယဝ်ႉ လွင်ႈသူၼ်ၸႂ် ၶူးလႄႈ လုၵ်ႈဢွၼ်ႇႁဵၼ်း ၼႂ်းႁွင်ႈႁဵၼ်းၼၼ်ႉၵေႃႈ မီး 100% ယဝ်ႉၼႆၸိုင် တႃႇႁႂ်ႈၽႃႇသႃႇၵၢၼ်သွၼ်တူဝ်ၸဝ်ႈၵဝ်ႇ ႁႂ်ႈယဝ်ႉၵႂႃႇၸွမ်း ႁူဝ်ၶေႃႈၵၢၼ်သွၼ်ၼၼ်ႉ ၶူးသွၼ်မၼ်းသမ်ႉတေလႆႈမီး ၽႅၼ်ၵၢၼ်လွင်ႈတူင်ႉၼိုင် ဢဝ်လုၵ်ႈဢွၼ်ႇႁဵၼ်းလဵၼ်ႈ  ဢွၼ်လုၵ်ႈဢွၼ်ႇတူင်ႉၼိုင်  ဢွၼ်လုၵ်ႈဢွၼ်ႇႁဵၼ်းႁဵတ်း သေႇမဵဝ်းမဵဝ်း ႁႂ်ႈမၼ်းမႃး ၵွင်ႉၵၢႆႇၵၼ် တၢင်းၽႃႇသႃႇၵၢၼ်သွၼ်တူဝ်ၸဝ်ႈၵဝ်ႇလႄႈ ႁူဝ်ၶေႃႈ ၽႃႇသႃႇ ၵၢၼ်သွၼ်တူဝ်ၸဝ်ႈၵဝ်ႇယိပ်း ၵႂႃႇၼၼ်ႉလႆႈလီ။ လွၵ်းလၢႆးသွၼ် လုၵ်ႈဢွၼ်ႇႁဵၼ်း ၵၢပ်ႈပၢၼ်ယၢမ်းလဵဝ်ၼႆႉ လုၵ်ႈဢွၼ်ႇတေလႆႈ ၼင်ႈသေထွမ်ႇၶူးလွင်ႈလႄႈ တေလႆႈတႅမ်ႈၸွမ်းမၢႆၸွမ်းႁဵတ်းၸွမ်းသေ ဢွၼ်ၵၼ်ၼင်ႈသေ ငဝ်ႈၼွၼ်းထွမ်ႇၶူးမၼ်းလၢတ်ႈလွင်ႈလဵဝ် ၵူၺ်းဢမ်ႇလႆႈယဝ်ႉ။

                        ၶၵ်ႉထီႉၼိုင်ႈ မိူဝ်ႈၶူးသွၼ်မၼ်း ဢမ်ႇပႆႇၶဝ်ႈၵႂႃႇသွၼ်လိၵ်ႈၼၼ်ႉ ၶူးသွၼ်မၼ်းတေလႆႈ ႁၢင်ႈႁႅၼ်း ဝၢင်းၽႅၼ်ၽႃႇသႃႇ ၵၢၼ်သွၼ်တူဝ်ၸဝ်ႈၵဝ်ႇၵႂႃႇလီလီဢွၼ်ႇတၢင်းလႄႈ လူဝ်ႇသႂ်ႇပႃး လွင်ႈတူင်ႉၼိုင်ပႃးၸွမ်း ၵၢၼ်ဝၢင်းၽႅၼ်ႁဝ်းၶႅမ်ႉၵႃႈႁိုဝ်ၵေႃႈ ၽွၼ်းယွၼ်မၼ်း တီႈလုၵ်ႈဢွၼ်ႇႁဵၼ်း တေဢွၵ်ႇမႃးၶႅမ်ႉလီမႃးၵႃႇၼၼ်ႉယဝ်ႉ။ သွၼ်ၸွမ်းၼႂ်းပပ်ႉ သွၼ်ယဝ်ႉ ႁႂ်ႈၶဝ်ႁဵတ်းႁင်းၵူၺ်း ပေႃးယဝ်ႉၵေႃႈ ပၼ်ၵၢၼ်ႁိူၼ်းမိူဝ်း ႁဵတ်းၸိူင်ႉၼႆၵူၺ်းတေႉဢမ်ႇလႆႈယဝ်ႉ။ လုၵ်ႈဢွၼ်ႇႁဵၼ်းဢၼ်ဝႃႈၼႆႉ မၼ်းပဵၼ်ၽွင်း တိုၵ်ႉလဵၼ်ႈ ၽွင်းတိုၵ်ႉလူၼ်း ၽွင်းတိုၵ်ႉၵျေႃႇ ဢမ်ႇပႆႇမီးလွင်ႈ မႆႈၸႂ်သင် ၵွပ်ႈၼၼ် လွင်ႈၶဝ်လႅၼ်ၵႂႃႇလႅၼ်မႃး လဵၼ်ႈလူင်ၵႂႃႇၵူႈမဵဝ်းၼၼ်ႉ ႁဝ်းလူဝ်ႇမေႃဢဝ်မႃး ပဵၼ်လွၵ်း လၢႆးၽႃႇသႃႇၵၢၼ်သွၼ်ႁဝ်း ႁႂ်ႈမၼ်းမႃးၵွင်ႉၵၢႆႇၵၼ် ၼႂ်းၵၢၼ်သွၼ်ၼၼ်ႉယဝ်ႉ။

                        လုၵ်ႈဢွၼ်ႇ ဢၼ်ဝႃႈၼႆႉ ထွမ်ႇသေ တူၺ်းသေ ၵူၺ်းၶဝ်ဢမ်ႇတွင်း တေလႆႈဢဝ်ၶဝ်လဵၼ်ႈ တူင်ႉၼိုင်ပႃးၸွမ်း ၽႃႇသႃႇၵၢၼ်သွၼ်တူဝ်ၸဝ်ႈၵဝ်ႇ မီးၵၢၼ်လွင်ႈတူင်ႉၼိုင်ၼမ်ၵႃႈႁိုဝ်ၵေႃႈ လုၵ်ႈဢွၼ်ႇတေၵျေႃႇသိူဝ်း ၼႂ်းၽႃႇသႃႇၵၢၼ်သွၼ်တူဝ်ၸဝ်ႈၵဝ်ႇလႄႈ ၶဝ်တေတွင်းၵိုမ်းၵႂႃႇၼႂ်းတူဝ် ၼႂ်းဢွၵ်း ၼႂ်းၸႂ်ၶဝ်ၵမ်းလဵဝ်ယဝ်ႉ။ ၽႃႇသႃႇ ၵူႈဢၼ်ဢၼ်ၼႆႉ မၼ်းတိုၼ်း ႁဵတ်းလႆႈ လွင်ႈတူင်ႉၼိုင်လႆႈ ၵူႈၽႃႇသႃႇယဝ်ႉ လိူဝ်သေဝႃႈ ၶူးသွၼ်မၼ်း တေမေႃၸႂ်ႉတိုဝ်း မေႃဝၢင်းၽႅၼ် ၼိူဝ်ၽႃႇသႃႇၵၢၼ်သွၼ် တူဝ်ၸဝ်ႈၵဝ်ႇ ႁႂ်ႈမီးလွင်ႈတူင်ႉၼိုင်ႈၸိူင်ႉႁိုဝ် ႁႂ်ႈမီးလွင်ႈၸၼ်ၸႂ် ႁႂ်ႈမီးလွင်ႈတူင်ႉတိုၼ်ႇ ၸိူင်ႉႁိုဝ် ၼႆၼၼ်ႉၵူၺ်း။

                        တႃႇတေပဵၼ်မႃး ၶူးသွၼ်ၼိုင်ႈၵေႃႉၼႆႉ မၼ်းဢမ်ႇငၢႆႈ ၵူႈမိူင်းမိူင်းၵေႃႈ ပိူၼ်ႈၸႂ်ႉတိုဝ်းငူပ်ႉ (Budget) လူင်းထုၼ်းၼႂ်း ၵၢၼ်ပၢႆးပၺ်ႇၺႃႇၵေႃႈ ဢမ်ႇဢေႇဢေႇ တႃႇၶူးသွၼ်မၼ်းၼိုင်ႈၵေႃႉ လူဝ်ႇမီးၼပ်ႉၵတ်ႉၼၼ်ႉၵေႃႈ ဢွၼ်ၵၼ်ၽိုၵ်းၽွၼ်ႉၵၼ်ၵူႈၶၢဝ်းယၢမ်း။ ပဵၼ်ၶူးသွၼ်မေႃသွၼ်လိၵ်ႈလွင်ႈလဵဝ်ၵူၺ်းဢမ်ႇလႆႈ တေလႆႈမေႃႁူႉ လွင်ႈႁူၼ်းမုၼ်းယႂ်ႇၶွင်လုၵ်ႈဢွၼ်ႇပႃးမိူၼ်ၵၼ် ဢႃႇယု ၵႃႇၼႆႉတေႃႇထိုင်ၵႃႇၼႆႉ ပၢႆးၸႂ်ၶဝ်ပဵၼ်ၸိူင်ႉႁိုဝ် ဢႃႇၵျၢမ်ႉတၢင်းယၢမ်ႈၶဝ်ပဵၼ်ၸိူင်ႉႁိုဝ် တေလႆႈႁူႉၵၼ်မူတ်းမူတ်း။

• သႅင်သိုၵ်း
• www.saisengserk.com

Share:

Read More

STARLINK ၼႆႉ ပဵၼ်သင်?

            Starlink ၼႆႉ ဢိင်ႇၼိူဝ်ငဝ်းလႆး ၵၢၼ်ဝၢၼ်ႈ ၵၢၼ်မိူင်း ၵၢၼ်သိုၵ်းသိူဝ်သေ ၼႂ်းမိူင်းႁူမ်ႈတုမ်ႇ မိူင်းမၢၼ်ႈဢိၵ်ႇပႃး ၼႂ်းမိူင်းၸိုင်ႈတႆး ၸိူဝ်းၼႆႉၵေႃႈ ဢွၼ်ၵၼ်သင်ႇသိုဝ်ႉၶိူင်ႈမၼ်းသေ သိုဝ်ႉၸႂ်ႉၵၼ်မႃးၵူႈတီႈတီႈယူႇ ဢိင်ႇၼိူဝ်ပိုၼ်ႉတီႈ ၼိုင်ႈယဝ်ႉတီႈၼိုင်ႈသေ ၵႃႈၶၢၼ်မၼ်းၵေႃႈ ၼမ်ၼမ်ဢႄႇဢႄႇ တေမီးလွင်ႈပႅၵ်ႈပိူင်ႈၵၼ် ၵႂႃႇဢိတ်းဢိတ်းယူႇ။ STARLINK ၼႆႉ ၸဝ်ႈၶွင်မၼ်းပဵၼ် ဢီႇလုၼ်ႇမၢၵ်ႉ (Elon Musk) သေ ပဵၼ်မိူင်းဢမႄႇရိႇၵၼ်ႇ ႁဵတ်းဢွၵ်ႇမႃး ၵမ်ႉၼမ် ဢမ်ႇလူဝ်ႇမီးလႅင်းၽူင်းသင် လူဝ်ႇမီးၾႆးၾႃႉလႄႈ ၸႂ်ႉလႆႈဢိင်ႇတႃႇၼႅတ်ႉ (Internet)လႆႈ ၵူႈတီႈတီႈ။

• STARLINK ဢၼ်ဝႃႈၼႆႉပဵၼ်သင်?

                        STARLINK ၼႆႉ ယူႇတီႈၶွမ်ႇမၼီႊ SpaceX သေႁဵတ်းဢွၵ်ႇမႃး တွၼ်ႈတႃႇ Satellite-based internet system ဢမ်ႇလူဝ်ႇသၢႆ ဢမ်ႇလူဝ်ႇလႅင်းၽူင်း ဢမ်ႇလူဝ်ႇလၵ်းသဝ်ႈၽူင်းသင်သေ ယူႇတီႈၶိူင်ႈ STARLINK ၼၼ်ႉသေ ယိုဝ်းၶိုၼ်ႈၼိူဝ်ၵၢင်ႁၢဝ် တေႃႇတီႈလၢဝ်ထိမ်း (Satellite) ၵမ်းသိုဝ်ႈၼၼ်ႉၵူၺ်း ယူႇတီႈၶွမ်ႇမၼီႊ SpaceX ၶဝ်သေ ပွႆႇလၢဝ်ထိမ်း (Starlink Satellite) ၶိုၼ်ႈၼိူဝ်ၵၢင်ႁၢဝ် တၢင်းလူင်ႈၵမ်ႇၾႃၼႆႉ

တေမီးယူႇ 6,000 လုၵ်ႈၶိုၼ်ႈၼိူဝ်ၵႂႃႇယူႇ (ၶေႃႈမုၼ်း chat GDP)။ STARLINK ၼႆႉ  တွၼ်ႈတႃႇ ၵူၼ်းၸိူဝ်းယူႇၼႂ်းထိူၼ်ႇလိုၵ်ႉလိုၵ်ႉလႄႈ တီႈဢၼ်ဢမ်ႇမီးလႅင်းၽူင်း တီႈဢၼ်မီးလွင်ႈၵၢၼ်ၵႂႃႇမႃးယၢပ်ႇ လႄႈ ၵၢၼ်ၵပ်းသိုပ်ႇၵၼ်ယၢပ်ႇၸိူဝ်းၼႆႉ သင်မီးၶိူင်ႈ STARLINK ၼႆႉဝႆႉ လုၵ်ႈၼိုင်ႈၼႆသေ လႆႈဝႃႈ ၵၢၼ်ၵႃႉၶၢႆ ၵၢၼ်ၵပ်းသိုပ်ႇၵၼ်လႄႈ ၵၢၼ်ၵူႈလွင်ႈလွင်ႈၵေႃႈ ၶႅမ်ႉလႅပ်ႈလီငမ်းမႃးလိူဝ်သေ မီးလႅင်းၽူင်းၼႆၵေႃႈဝႃႈလႆႈယူႇ လႅင်းဢိင်ႇတႃႇၼႅတ်ႉ ၵေႃႈဝၢႆး ဢဝ်ၵႂႃႇငၢႆႈမႃးငၢႆႈ မၢၵ်ႇပွၵ်ႈ ဢဝ်သႂ်ႇၸွမ်းလူတ်ႉ ၸွမ်းၵႃးသေ ၵႂႃႇမႃးလႄႈၸႂ်ႉတိုဝ်း ဢိင်ႇတႃႇၼႅတ်ႉ ၸိူဝ်းၼႆႉၵေႃႈလႆႈမိူၼ်ၵၼ် (ယႃႇႁႂ်ႈသိုၵ်းမၢၼ်ႈၶဝ်ႁၼ်ပႃးၼင်ႇၵဝ်ႇ)။ ၵမ်ႉပႃႇၼမ် ၼႂ်းမိူင်းႁူမ်ႈတုမ်ႇမိူင်းမၢၼ်ႈ ၼႂ်းမိူင်းတႆးႁဝ်းၸိူဝ်းၼႆႉတေႉ တေလႆႈႁၼ် ဢွၼ်ၵၼ်ၸႂ်ႉတိုဝ်းမႃးၼမ်ဝႆႉယူႇ ၵမ်ႉၼမ်လႆႈႁၼ် ပွတ်းၸိူဝ်းမီးပၢင်တိုၵ်းသိုၵ်းသိူဝ်လႄႈ ၸိူဝ်းတီႈ ၸုမ်းသိုၵ်းမၢၼ်ႈၶဝ် တတ်းပႅတ်ႈလႅင်းၽူင်း လႅင်းဢိင်ႇတႃႇၼႅတ်ႉၸိူဝ်းၼႆႉၼၼ်ႉယဝ်ႉ။ ယၢမ်းလဵဝ်တေႉၵေႃႈ STARLINK ၼႆႉ ၼႂ်းမိူင်းမၢၼ်ႈ ၶဝ်ဢမ်ႇပႆႇပၼ်ၸႂ်ႉၶဝ်ႈတၢင်းၵၢၼ်ၵၼ် ၵမ်ႉၼမ်လွမ်လွမ်လၵ်ႉၸႂ်ႉတိုဝ်းၵၼ် ႁဵတ်းၼၼ်ဝႆႉၵူၺ်း သင်သိုၵ်းမၢၼ်ႈၶဝ် ႁၼ်ၼႆၸိုင် တေၸၢင်ႈထုၵ်ႇၺႃးတိႉၺွပ်းသိမ်းပႅတ်ႈလၢႆလၢႆလႄႈ ၸဝ်ႈၶွင်မၼ်းၵေႃႈ ၸၢင်ႇထုၵ်ႇၺႃးတိႉၺွပ်းပႃးမိူၼ်ၵၼ်ယူႇ။

• STARLINK 

                          ၶိူင်ႈ STARLINK ၼႆႉ မၼ်းတေမီးယူႇလၢႆလၢႆလုၼ်ႇ  1) STARLINK GEN 1.  2) STARLINK GEN 2.  3) STARLINK GEN 3  လႄႈ 4) STARLINK MINI ၼႆသေ ဢွၵ်ႇမႃးမီးလၢႆလၢႆလုၼ်ႇဝႆႉယူႇ  ၼႂ်း (4) မဵဝ်းၼႆႉ ဢိၵ်ႇၼိူဝ် ႁဝ်းတေၸႂ်ႉတိုဝ်း ၼႂ်းၼႃႈၵၢၼ်ငၢၼ်းႁဝ်း မီးဝႆႉၸိူင်ႉႁိုဝ်တေႉတေႉၼႆသေ သိုဝ်ႉၸႂ်ႉတိုဝ်းၵၼ်ၵႂႃႇၽႂ်မၼ်းယူႇ။

                        ပေႃးတေၸႂ်ႉပဵၼ်ၼႃႈႁိူၼ်း ၶွပ်ႈၶူဝ်းလႄႈ ဢမ်ႇၶႂ်ႈၸႂ်ႉၾႆးၼမ် ၸႂ်ႉ Power station ၵူၺ်းသေ ဢဝ်ဢွၵ်ႇတၢင်းၵေႃႈ ႁႂ်ႈလႆႈၼႆၼၼ်ႉသမ်ႉ ၵမ်ႉၼမ်ဢွၼ်ၵၼ်သိုဝ်ႉၸႂ်ႉ STARLINK MINI ၶိူင်ႈတူဝ် လဵၵ်ႉလဵၵ်ႉဢွၼ်ႇၼၼ်ႉၵမ်ႉၼမ်ယဝ်ႉ။ ပေႃးတေႁဵတ်းၵိၼ်ၵၢၼ်ပၢႆးမၢၵ်ႇမီးလႄႈ ၸႂ်ႉတိုဝ်းၵူၼ်းတၢင်းၼမ်ၼႆသမ်ႉ ဢွၼ်ၵၼ်သိုဝ်ႉၸႂ်ႉပဵၼ် STARLINK GEN 3  ယွၼ်ႉဝႃႈ ၶိူင်ႈၽူင်းလႄႈ ၶွမ်း (Device) ၸႂ်ႉလႆႈ ၵွင်ႉလႆႈလုၵ်ႈမၼ်းလႆႈၼမ်။ ပေႃးႁဝ်းတေယူႇတီးႁိူၼ်းသေ ဢမ်ႇလူဝ်ႇၶၢႆႉ ဢမ်ႇလူဝ်ႇဢဝ်ၵႂႃႇတၢင်းလႂ် တင်ႈဝႆႉပဵၼ်ပိူင်တၢႆတီႈၵဝ်ႇတီႈလဵဝ်ၵူၺ်းၼႆသမ်ႉ တေလႆႈႁၼ်ဢွၼ်ၵၼ်သိုဝ်ႉၸႂ်ႉ STARLINK GEN1 & GEN2 ဝႆႉ ၵႃႈၶိူင်ႈမၼ်းၵေႃႈတေထုၵ်ႇလႄႈ ဢဝ်ၵႂႃႇယၢပ်ႇမႃးယၢပ်ႇၵူၺ်း။

• ၶၵ်ႉတွၼ်ႈႁဵတ်းၵၢၼ်မၼ်း

                        ၸွမ်းၼင်ႇ ၶေႃႈမုၼ်းမၼ်းတႅမ်ႈမႃးတီႈၵွင်ႇပူဝ်ႈမၼ်း လႄႈ ၼႂ်း Chat GDP ဝႃႈတေႉၵေႃႈ Starlink Home Kit Gen 1 ၼႆႉ မၼ်းတေၸွႆးၵွင်ႉ (Join) လႆႈတၢင်းၶွမ်းလႄႈ ၽူင်းႁူမ်ႈ 128 လုၵ်ႈၼႆဝႆႉပႃးယူႇ (Support up to 128 devices)။ တၢင်းဝၢႆး ဢိၵ်ႇတႃႇၼႅတ်ႉ (Internet) မၼ်းသမ်ႉ တေပဵၼ် 50 Mbps ထိုင် 200 Mbps ၼႆ မၼ်းတေတႅမ်ႈဝႆႉပႃး ၸိူင်ႉၼၼ်ယူႇ။ Starlink Gen2 သမ်ႉ. မၼ်းတေၸႂ်ႉတိုဝ်ႉလႆႈ

တၢင်းၶွမ်း တၢင်းၽူင်း ႁူမ်ႈ 235 ၶိူင်ႈၼႆယူႇ  ယွၼ်ႉပိူဝ်ႈဝႃႈ မၼ်းၶိုၵ်ႉၶႅမ်ႉမႃးထႅင်ႈလွၵ်းလၢႆးပိၼ်ႇၺႃႇမႂ်ႇ တေၽိူမ်ႉသႂ်ႇပႃး  MU-MIMO (Multi-user MIMO) ၸိူဝ်းၼႆႉပႃးထႅင်ႈယူႇ ၵူၺ်းပေႃးတူၺ်း ဝၢႆႇၽၢႆႇ (WIFI) ဢၼ်ၸပ်းပႃးမႃးၼႂ်းတူဝ်ၶိူင်ႈ STARLINK GEN1 GEN2 ၸိူဝ်းၼႆႉတေႉၵေႃႈ ပဵၼ်တၢင်းႁႅင်း ဝၢႆႇၽၢႆႇႁႃႈ (Wifi5) ၵူၺ်းသေ တၢင်းၵႂၢင်ႈပၼ်မုၼ်းမၼ်းၸႂ်ႉတိုဝ်းလႂ် မွၵ်ႈ 500ft ပၼ်ႇမုၼ်းၵူၺ်းၼႆယဝ်ႉ။

                        ပေႃးတူၺ်းလုၼ်ႈ Starlink Gen 3 သမ်ႉ မၼ်းတေၸႂ်ႉတိုဝ်းလႆႈ တၢင်းၶွမ်း တၢင်းၽူင်း ႁူမ်ႈၵၼ်လႆႈ 235 လုၵ်ႈသေ Hardware မၼ်းၵေႃႈ တေၸၼ်ႉသုင်ၶိုၼ်ႈမႃးထႅင်ႈ ၸႂ်ႉလႆႈပဵၼ် ဝၢႆႇၽၢႆႇႁူၵ်း (Wifi6 tri-band + 4x4 MU-MIMO + OFDMA)) လႅင်းမၼ်းတေၼိမ်လႄႈ ၵူၼ်းၸိူဝ်းမႃးၵွင်ႉၸွႆးၸႂ်ႉတိုဝ်းၽူင်းၸိူဝ်းၼၼ်ႉၵေႃႈ တေဢမ်ႇပေႃးၵႆႉမီးပၼ်ႁႃသင်တေႉတေႉ ဢၢင်ႇၶႂၢင်ႇႁဵတ်းၵၢၼ် ဝၢႆႇၽၢႆႇမၼ်းၵေႃႈ 600ft ပၼ်မုၼ်း ၸႂ်ႉလႆႈလီလီၼႆသေ ယူႇတီႈၶွမ်ႇမၼီႊၶဝ် လၢတ်ႈဢွၵ်ႇမႃးယူႇ။ 

                        ယူႇတီႈသုၼ်ႇတူဝ်ၶႃႈႁဝ်း ၸႂ်ႉတိုဝ်းဝႆႉ လုၼ်ႈၼႆႉသေ တီႈလႆႈထူပ်းၺႃးတေႉၵေႃႈ ၸွမ်းၼင်ႇၶဝ်တႅမ်ႈဝႆႉၼၼ်ႉတေႉၵေႃႈ တဵမ်ႈထူၼ်ႈလႄႈ ၶႅမ်ႉလႅပ်ႈလီယူႇ ၵူၺ်းလုၼ်ႈၼႆႉတေႉ မၼ်းတေၵိၼ်ၾႆးၾႃႉၼမ်လႄႈ ၸၼ်ႁႅင်းၾႆးၾႃႉ ဢိတ်းဢိတ်း   ၼိုင်ႈၶိူင်ႈၽူင်း ၶွမ်းပိူၼ်ႈမႃး ၵွင်ႉလဵၼ်ႈတီႈၶိူင်ႈ STARLINK ႁဝ်းၼမ် မၼ်းၼိုင်ႈၸၼ်ၵိၼ်ႁႅင်းၾႆးၼမ်ၼၼ်ႉယဝ်ႉ။ လုၼ်ႈၼႆႉ ပေႃးတေႁဵတ်းၵိၼ် ၵၢၼ်ပၢႆးမၢၵ်ႇမီး (Small Business) ၼႆၸိုင် တေလႆႈဝႃႈ ထုၵ်ႇမႅၼ်ႈယူႇ ၶိူင်ႈၽူင်း ၶိူင်ႈၶွမ်းပိူၼ်ႈ ၵွင်ႉလဵၼ်ႈတီႈႁဝ်းလႆႈၼမ်။ ပေႃးမႃးတူၺ်း STARLINK MINI သမ်ႉ မၼ်းတေၸႂ်ႉတိုဝ်း

လႆႈ ၽူင်းၶွမ်း 128 လုၵ်ႈၵူၺ်း တေဢမ်ႇၸႂ်ႉတိုဝ်းၼမ်လႆႈမိူၼ် GEN3 ဝၢႆႇၽၢႆႇမၼ်းၵေႃႈ (WIFI5 Portable terminal with built-in- Wifi) ပဵၼ်ဝၢႆႇၽၢႆႇႁႃၵူၺ်းလႄႈ ၸပ်းပႃးမႃးၼႂ်းတူဝ်ၶိူင်ႈတီႈၸၼ်းမၼ်းၵမ်းလဵဝ် ပေႃးပိုတ်ႇၶိူင်ႈမၼ်းယဝ်ႉၵေႃႈ ၸႂ်ႉတိုဝ်းလႆႈ ဢၢင်ႇၶႂၢင်တၢင်းၵႆ 450ft ၼႂ်းပၢင်ပဵင်းပဵင်းၵူၺ်း သင်မီးသေလွင်ႈလွင်ႈႁႄႉဝႆႉၼႂ်းၵႄႈၵၢင်မၼ်းၼႆၸိုင် ႁႅင်းဝၢႆႇၽၢႆႇမၼ်းတေတူၵ်း။

                        ၽွၼ်းလီမၼ်းတေႉၵေႃႈ ဢဝ်ၵႂႃႇငၢႆႈမႃးငၢႆႈ မၢၵ်ႇပွၵ်ႈၵေႃႈ ဢဝ်သႂ်ႇၼိူဝ်ပွင်းလူတ်ႉလူင်ႁဝ်းသေဢဝ်ၵႂႃႇမႃးၵေႃႈလႆႈ မၢၵ်ႇပွၵ်ႈ ပေႃးဢွၵ်ႇတၢင်းၵေႃႈ ဢဝ်သႂ်ႇၼႂ်းထူၼ်ပိူဝ်ႉႁဝ်းၵႂႃႇၸွမ်းတူဝ်ႁဝ်းၵေႃႈလႆႈ ၾႆးၵေႃႈမၼ်းဢမ်ႇၵိၼ်ၼမ် ၼႂ်းၼၼ်ႉတေႉ မၼ်းတေတႅမ်ႈဝႆႉဝႃႈ STARLINK MINI ၼႆႉတေၵိၼ်ၾႆးၾႃႉ 35Watt ၼႆယူႇ။ ၸွမ်းၼင်ႇၶႃႈႁဝ်း ယၢမ်ႈလႆႈၸႂ်ႉတိုဝ်းမႃး STARLINK MINI မိူၼ်ၵၼ်ၼၼ်ႉ ၼႂ်းၶွမ်ႇမၼီႊၶဝ်တေႉလၢတ်ႈဝႃႈ STARLINK MINI

ၼႆႉႁပ်ႉလႆႈ ၽူင်းလႄႈ ၶွမ်းႁူမ်ႈ 128 လုၵ်ႈၼႆသေတႃႉၵေႃႈ  ၸွမ်ႈၼင်ႇယၢမ်ႈၸႂ်ႉတိုဝ်းမႃးတေႉၵေႃႈ ဢမ်ႇႁပ်ႉလႆႈသင်တေႉတေႉ သင်ဝႃႈ ၽူင်းလႄႈ ၶွမ်းပိူၼ်ႈမႃး ၵွင်ႉၵၼ်တၢင်း Starlink mini ႁဝ်းယဝ်ႉၼႆၸိုင် မၼ်းဢမ်ႇပူၼ်ႉလႆႈ 70 လုၵ်ႈ သင်ပူၼ်ႉ 70 လုၵ်ႈၵႂႃႇယဝ်ႉၵေႃႈ လႅင်းမၼ်းတေၶမ်လႄႈ တူၺ်းသင်ၵေႃႈဢမ်ႇလႆႈ ၶိူင်ႈ STARLINK ႁဝ်းၵေႃႈတေမႆႈမႃး ယွၼ်ႉပိူဝ်ႈဝႃႈ ၶွမ်ႇမၼီႊၶဝ် ႁဵတ်ႈဢွၵ်ႇမႃးၵေႃႈ တွၼ်ႈတႃႇ ဢဝ်ဢွၵ်ႇတၢင်း တွၼ်ႈတႃႇ တေၸႂ်ႉပဵၼ်ၶွပ်ႇၶူဝ်းၵူၺ်း ဢမ်ႇၸႂ်ႈတႃႇပၢႆးမၢၵ်ႇမီးလႄႈ မၼ်းၵေႃႈ မီးတီႈယုၵ်ႈယွမ်းပႃးမိူၼ်ၵၼ်ယူႇ။

• ၵႃႈၶၢၼ်လႄႈ ၵႃႈဢိင်ႇတႃႇၼႅတ်ႉ

                        ၵႃႈၶိူင်ႈ STARLINK ၼႂ်းမိူင်းႁူမ်ႈတုမ်ႇမိူင်းမၢၼ်ႈႁဝ်းလႄႈ ၼႂ်းမိူင်းတႆးႁဝ်းတေႉၵေႃႈ တီႈၼိုင်ႈလႄႈ တီႈၼိုင်ႈ မၼ်းၵေႃႈတေမီးလွင်ႈပႅၵ်ႈပိူင်ႈၵၼ်ဢိတ်းဢိတ်းယူႇ ပေႃးတူၺ်းၼႂ်းမိူင်းၸိုင်ႈတႆး ပွတ်းႁွင်ႇ ပွတ်းတီႈၸုမ်းသိုၵ်း ဢူၺ်းလီၶဝ် ၵုမ်းၵမ်ဝႆႉၼၼ်ႉသမ်ႉ STARLINK GEN3 တေမီးယူႇမွၵ်ႈ 85 သႅၼ်ပျူး STARLINK MINI သမ်ႉတေမီးယူႇ ၸမ်ၸမ် မွၵ်ႈ 90သႅၼ်ပျူးထိုင် 100 သႅၼ်ပျူးၸိူဝ်းၼႆႉပႃးယူႇ ဢိင်ႇၼိူဝ် ပိုၼ်ႉတီႈ တီႈၼိုင်ႈယဝ်ႉတီႈၼၼ် (ၶၢၼ်မၼ်းတေၸၢင်ႈပိူင်ႈၵၼ်) ပေႃးတူၺ်း မိူင်းတႆးပွတ်းၸၢၼ်းသမ်ႉ မၢၵ်ႇတီႈ STARLINK GEN3 မီး 100 သႅၼ်ပျူး STARLINK MINI သမ်ႉမီး 125 သႅၼ်ပျူးၸိူဝ်းၼႆႉၵႂႃႇယူႇ။

                        ၵႃႈဢိင်ႇတႃႇၼႅတ်ႉ (Internet Cost) တေႉ ဢိင်ႇၼိူဝ် လုၵ်ႈၼိုင်ႈလႄႈ လုၵ်ႈၼိုင်ႈမၼ်းဢမ်ႇ

မိူၼ်ၵၼ် ယဝ်ႉၵေႃႈ ဢိင်ႇၼိူဝ် ႁဝ်းဢၢပ်ႇပၼ် Service တီႈၼိုင်ႈလႄႈ တီႈၼိုင်ႈ ၼႆႉၵေႃႈ မၼ်းၸၢင်ႈပႅၵ်ႈပိူင်ႈၵၼ် ပေႃးမႃးတူၺ်း ပိူင်မၼ်းတေႉတေႉၵေႃႈ ပေႃးဢဝ်တင်ႈ STARLINK မႂ်ႇလႄႈ ဢဝ်ဢွင်ႈတီႈ ဝၢၼ်ႈမိူင်း (Regional) သေသိုဝ်ႉပိုတ်ႇမိူင်းၾီးလိပ်းပိၼ်း (Philippness) ၸွမ်းၼင်ႇ ၶႃႈယၢမ်ႈပိုတ်ႇလႄႈ ၸႂ်ႉတိုဝ်းယူႇယၢမ်းလဵဝ်တေႉၵေႃႈ တေႃႇလိူၼ်တေႃႇလိူၼ်ၼႆႉ တေယဝ်ႉယူႇ ငိုၼ်းၾီးလိပ်းပိၼ်း (PHP 4100) မွၵ်ႈငိုၼ်းထႆး ၼႂ်းၵႄႈ 2800 - 3500 ဝၢတ်ႇ ဢိင်ႇၼိူဝ် ၶၢၼ်ငိုၼ်းၶိုၼ်ႈလူင်း တၢင်းဝႆၢးမၼ်းတေႉၵေႃႈ ဢမ်ႇလူဝ်ႇလၢတ်ႈသင်ၶႃႈ မၼ်းဝၢႆးတေႉတေႉဝႃႈဝႃႈယူႇ။

• သင်ၶႂ်ႈသိုဝ်ႉ

                          သင်ၶႂ်ႈသင်ႇလႄႈ ၶႂ်ႈသိုဝ်ႉၼႆၸိုင် ၶဝ်ၵႂႃႇသင်ႇတီႈၼႂ်း www.starlink.com တီႈၶွမ်ႇမၼီႊ SpaceX ၶဝ်ၼၼ်ႉၵေႃႈလႆႈမိူၼ်ၵၼ်ယူႇ သင်ဢမ်ႇမေႃသင်ႇလႄႈ ၶႂ်ႈလႆႈၼႆၸိုင် တၵ်ႉထၢမ်ႇမႃးတီႈၶႃႈႁဝ်းၵေႃႈလႆႈမိူၼ်ၵၼ် တၵ်ႉမႃးၼႂ်း Facebook Page_ Sai Seng Serk ဢမ်ႇၼၼ် ၶဝ်ႈမႃးထၢမ်ႇၼႂ်း Website_ www.saisengserk.com ၸိူဝ်းၼႆႉၵေႃႈလႆႈပႃးမိူၼ်ၵၼ်ယူႇ။

                        တွၼ်ႈတႃႇ ၵူၼ်းမိူင်းၸိုင်ႈတႆးႁဝ်း ၵူၼ်းၶိူဝ်းတႆးႁဝ်း တေဢမ်ႇတူၵ်းတဵမ်ႇ ဢမ်ႇတူၵ်းၶၢဝ်ႇ ဢမ်ႇႁူႉသင်ၼၼ်ႉ ယႃႇႁႂ်ႈလႆႈမီး ၸွမ်းၼင်ႇပွင်ႇပဵၼ်လႆႈလႄႈ ၸွႆႈလႆႈၵႃႈႁိုဝ်ၼၼ်ႉၵေႃႈ ၶႃႈတေၸွႆႈသပ်ႉလႅင်းၼႄပႃးၵႂႃႇပႃးမိူၼ်ၵၼ်ယူႇ။ ဢမ်ႇဝႃႈ ၶႂ်ႈႁဵတ်းပဵၼ် ၵၢၼ်ပၢႆးမၢၵ်ႇမီး တင်ႈတီႈဝၢၼ်ႈႁဝ်းသေ ပႂ်ႉၵဵပ်းၵိၼ် ၵႃႈ Voucher Code ၸိူဝ်းၼႆႉၵေႃႈ ၵပ်းသိုပ်ႇၼႄႉၼမ်းပၼ်ပႃးလႆႈမိူၼ်ၵၼ်ယူႇ. ၵၢၼ်သင်ၵေႃႈယဝ်ႉ ႁဝ်းႁူႉၼိုင်ႈ ပိူၼ်ႈႁူႉသွင် ပေႃးႁဝ်းမေႃၸွႆႈပိၼ်ႇပၢႆႇလႅၵ်ႈလၢႆႈတၢင်းႁူႉပၼ်ၵၼ်ၵေႃႈ ၵူၼ်းတႆးႁဝ်း ၸိူဝ်ႉၶိူဝ်းႁဝ်း လႅတ်းမႃး ႁူႉမႃးၼိုင်ႈၵေႃႉၵေႃႈ ၶိူဝ်းႁဝ်းလႆႈဝႃႈ ၶိုၼ်ႈယႂ်ႇမီးၵူၼ်းမီး တၢင်းႁူႉၶိုၼ်ႈမႃး ၼိုင်ႈၵေႃႉမိူၼ်ၵၼ်ယဝ်ႉၶႃႈ မႂ်ႇသုင်ၶႃႈ။

• ၶူင်းၵၢၼ်ဢၼ်ၶႃႈတင်ႈ (Project)

                        ယိၼ်းလီတီႈၶဝ်ႈမႃးပၼ်ႁႅင်းလႄႈ ႁၵ်ႉႁွမ်လူဢၢၼ်ႇလိၵ်ႈလၢႆးတႆးႁဝ်း ၵၼ်ၵူႈၵေႃႉယူႇၶႃႈ။ ယွၼ်ႉပိူဝ်ႈငဝ်းလၢႆး ၵၢပ်ႈပၢၼ်ႇမႂ်ႇၶိုၼ်ႈမႃးၵူႈဝၼ်းဝၼ်းလႄႈ တွၼ်ႈတႃႇ ၵူၼ်းၸိူဝ်ႉၶိူဝ်းတႆးႁဝ်း တေဢမ်ႇပဵၼ်ၵူၼ်း ႁူတၼ်တႃတၼ်ၼၼ်ႉ ပုၼ်ႈၽွၼ်းမီးၼိူဝ်ႁဝ်းၶႃႈၵူႈၵေႃႉ  ယႃႇႁႂ်ႈတႆးတူၵ်းတဵမ်ႇ ယႃႇႁႂ်ႈတႆး ဢမ်ႇႁူႉသင်ၼၼ်ႉ ၸွမ်းၼင်ႇႁဝ်းႁူႉ ၶႃႈၶဝ်မေႃပွင်ၸႂ်ၼၼ်ႉ တေၶတ်းၸႂ် မႃးလူင်းတႅမ်ႈပဵၼ်လိၵ်ႈယူႇၶႃႈ တွၼ်ႈတႃႇ တေမီးၽူႈလူလိၵ်ႈတႆးႁဝ်းမႃးၼမ်ၼမ်။

• သႅင်သိုၵ်း
• www.saisengserk.com

Share:

Read More

ၼမ်ႉၵတ်ႉၽႃႇသႃႇၵႂၢမ်းလၢတ်ႈ (Language Skills)

                        ပေႃးလၢတ်ႈၵၢၼ်ႁဵၼ်းၵၢၼ်သွၼ်ၼႆ မၼ်းတေမီးယူႇသွင်တွၼ်ႈ ပေႃးဢမ်ႇႁူႉၸႅင်ႈလႅင်းလီ သွင်တွၼ်ႈၼႆႉၸိုင် တေဢမ်ႇပႆႇႁူႉပွင်လွင်ႈၵၢၼ်ပၢႆးပၺ်ႇၺႃႇၼႆႉလီလီ။ ၵမ်ႉပႃၼမ် ပေႃးႁဝ်းပဵၼ် ၶူးသွၼ် ၽူႈၵွၼ်းႁူင်းႁဵၼ်း ၊ ၽူႈႁဵတ်းၵၢၼ်ပၢႆးပၺ်ႇၺႃႇၼႆ တေလႆႈႁူႉသွင်လွင်ႈၼႆႉလီလီသေ တေလႆႈပဵၼ်ၵူၼ်း ဝၢင်းၽႅၼ်ၵၢၼ်ႁဵၼ်းၵၢၼ်သွၼ်လႆႈလီလီ ပေႃးဢမ်ႇၼၼ် ႁဝ်းသွၼ်လုၵ်ႈဢွၼ်ႇတေႃႇဝၼ်း ၶဝ်လႆႈသင်မိူဝ်း ယဝ်ႉၵေႃႈတေႃႇလိူၼ်ၶဝ်လႆႈသင် တေႃႇပီႊလူးၶဝ် သမ်ႉမီးလွင်ႈတိူင်းတွၼ်း ၶိုၼ်ႈသင်မႃးၼႆ တေလႆႈတမ်းဝၢင်း လွၵ်းထတ်းမၼ်းလႄႈ ႁူႉလွင်ႈၵၢၼ်ပၢႆးပၺ်ႇၺႃႇလီလီ။   

                        ၼႂ်း (2) လွင်ႈၼၼ်ႉ  1) Daily Language ၵႂၢမ်းလၢတ်ႈၵပ်းသိုပ်ႇၵၼ်တေႃႇဝၼ်း. 2) Academic Language ဢဝ်ၸၼ်ႉလိၵ်ႈပဵၼ်ၸၼ်ႉပဵၼ်ၸၼ်ႉသေသွၼ်လိၵ်ႈ. ၽွၼ်းလႆႈမၼ်းလႄႈ ၼမ်ႉတွၼ်း မၼ်းၵေႃႈ တိုၼ်ႈဢမ်ႇမိူၼ်ၵၼ် မၼ်းတိုၼ်းမီးလွင်ႈပႅၵ်ႈပိူင်ႈၵၼ်ဝႆႉၼၼ်ႉယဝ်ႉ။

• Daily Language                        

                        ပေႃးမႃးတူၺ်းၼႂ်းႁူဝ်ၶေႃႈမၢႆၼိုင်ႈ Daily Language ၵၢၼ်လၢတ်ႈၸႃႇ ၵပ်းသိုပ်ႇၵပ်းသၢၼ်တေႃႇၵၼ် တေႃႇဝၼ်းၼၼ်ႉ ႁဝ်းႁဵၼ်းႁူႉဢဝ်လႆႈဝၢႆးလႄႈ ႁဵတ်းႁူႉဢဝ်လႆႈငၢႆႈတေႉတေႉယဝ်ႉ ၵမ်ႉပႃၼမ် Daily Language ၼႆႉ ပေႃးပဵၼ်တီႈမိူင်းမၢၼ်ႈတေႉ ပိူၼ်ႈတေဢွၼ်ၵၼ်ၸႂ်ႉတိုဝ်းၼမ်တေႉတေႉလႄႈ ၵႆႉႁၼ်ပိူၼ်ႈပိုတ်ႇ ပၢင်သွၼ်တၢင်းၼွၵ်ႈပဵၼ် Short Term   မိူၼ်ၵၼ်ယူႇ။ ယွၼ်ႉပိူဝ်ႈဝႃႈ Daily Language ၼႆႉ လၵ်းလၵ်းမၼ်း မၼ်းပဵၼ်တွၼ်ႈတႃႇ ၽိုၵ်းႁႂ်ႈမေႃလၢတ်ႈၵႂၢမ်းဢၢင်းၵိတ်း ၊ ၵႂၢမ်းထႆး ၊ ၵႂၢမ်းၶႄႇ  လွင်ႈလဵဝ်ၵူၺ်း မၼ်းဢမ်ႇၸႂ်ႈ တႃႇႁဵၼ်းႁူႉ ၶဝ်ႈလိုၵ်းလိုၵ်းလႄႈ တွၼ်ႈတႃႇတေႁပ်ႉၸုမ်ႈၶူး။

                        ပေႃးယၢမ်ႈယူႇမိူင်းမၢၼ်ႈမႃးၵၼ်တေႉ တေႁူႉၵၼ်ယူႇ ပေႃးတီႈဝဵင်းလူင် တႃႇၵုင်ႈ ပေႃးၵႂႃႇၼႂ်းဝဵင်း ၵႆႉၵႆႉႁၼ်ပိူၼ်ႈတႅမ်ႈပၢႆႉပိူၼ်ႈဝႃႈ English Speaking (4) Months and 4 Skills ၼႆဝႆႉ တီႈၸွမ်း ႁွင်ႈႁိူၼ်းပိူၼ်ႈၸိူဝ်းၼၼ်ႉယူႇ။ ယွၼ်ႉပိူဝ်ႈဝႃႈ ၵၢၼ်ႁဵၼ်းၵၢၼ်သွၼ်ဢၼ်ၼႆႉ မၼ်းပဵၼ်ၶၢဝ်းပွတ်း ၵူၺ်း။ တွၼ်ႈတႃႇတေမေႃလၢတ်ႈၽႃႇသႃႇၵႂၢမ်းလၢတ်ႈထီႉသွင် ထီႉသၢမ်ၼႆႉသမ်ႉ ၸိူဝ်းႁဝ်းပဵၼ်ၶူးသွၼ်လႄႈ ၽူႈၵဵဝ်ႇၶွင်ပၢႆးပၺ်ႇၺႃႇမၼ်း သမ်ႉတေလႆႈႁူႉထႅင်ႈဝႃႈ တႃႇတေမေႃလၢတ်ႈၽႃႇသႃႇၵႂၢမ်းလၢတ်ႈမႂ်ႇမႂ်ႇမႃးလႆႈထႅင်ႈၼၼ်ႉ တေလႆႈၽိုၵ်းႁဵတ်းၸိူင်ႉႁိုဝ်ၼႆထႅင်ႈၵၼ်ယူႇ။

                        တူဝ်ယၢင်မၼ်း ယၢမ်းလဵဝ်ႁဝ်းၶႃႈၶဝ် မေႃၽႃႇသႃႇၵႂၢမ်းလၢတ်ႈမႄႈ (Mother Language) လီ ငမ်းယဝ်ႉ တီႈပွင်ႇဝေႃးႁႃႇရႃႉတႆးႁဝ်းၸိူဝ်းၼႆႉၵေႃႈ ႁူႉ ပွင်ႇၸႂ်လႆႈလီယဝ်ႉ တႅမ်ႈၵေႃႈမေႃတႅမ်ႈလိၵ်ႈတႆးယဝ်ႉ ၵႂၢမ်းၼႂ်းႁိူၼ်းႁဝ်းၵေႃႈ ၸႂ်ႉၵႂၢမ်းတႆးတေႃႇၵၼ်လႄႈ ႁူႉတီႈပွင်ႇၵူႈလွင်ႈယဝ်ႉၼႆၸိုင်ႈ တွၼ်ႈတႃႇတေမႃးသွၼ် ႁဵၼ်းႁူႉဢဝ်ထႅင်ႈ ၽႃႇသႃႇၵႂၢမ်းလၢတ်ႈထီႉသွင် (Second Language L2) ၼၼ်ႉမၼ်းငၢႆႈငၢႆႈဢွၼ်ႇၵူၺ်း။ ပေႃးမိူၼ်ၼင်ႇၶႃႈၼႆတေႉ ၽႃႇသႃႇထီႉၼိုင်ႈၶႃႈတေ ပဵၼ်ၵႂၢမ်းတႆး လိၵ်ႈတႆး ၽႃႇသႃႇထီႉသွင်ၶႃႈသမ်ႉပဵၼ် ၵႂၢမ်းမၢၼ်ႈလိၵ်ႈမၢၼ်ႈ ၽႃႇသႃႇထီႉသၢမ်ၶႃႈသမ်ႉပဵၼ် ၵႂၢမ်ႈဢၢင်းၵိတ်း လိၵ်ႈဢၢင်းၵိတ်ႉ. ၽႃႇသႃႇထီႉသီႇၶႃႈသမ်ႉပဵၼ် ၵႂၢမ်းထႆးလိၵ်ႈထႆး ၽႃႇသႃႇထီႉႁႃႈၶႃႈသမ်ႉပဵၼ် ၵႂၢမ်းမူးသိူဝ်း။

                        ၵမ်းၼႆႉ ပေႃးႁဝ်းတေႁဵၼ်းႁူႉဢဝ်ထႅင်ႈၽႃႇသႃႇထီႉသွင် ထီႉသၢမ်ႁဝ်းၼႆၸိုင်ႈ ႁဝ်းတေလႆႈႁူႉႁဵၼ်းဢဝ် လွၵ်းလၢႆးမၼ်း ႁႂ်ႈမၼ်းမႅၼ်ႈပိူင်ႈမၼ်းလႄႈ ထုၵ်ႇမႅၼ်ႈ တႃႇႁဝ်းၼၼ်ႉလီလီယူႇ။ တူဝ်ယၢင်ႇမၼ်း ပေႃးႁဝ်းတေႁဵၼ်းၽႃႇသႃႇဢၢင်းၵိတ်ႉ (English Language) ၼႆၸိုင်ႈ ႁဝ်းတေလႆႈတေႇႁဵၼ်းႁူႉဢဝ် ၵၢၼ်ထွမ်ႇငိၼ်း (Listening) ဢွၼ်တၢင်းၼမ်ၼမ်လူးၵွၼ်ႇ မိူဝ်ႈတႄႇမၼ်းႁဝ်းဢမ်ႇႁူႉတီႈပွင်မၼ်း ဢမ်ႇႁူႉၶေႃႈမၼ်း ဢမ်ႇႁူႉဝႃႈ ဝႃႈသင် ၵူၺ်းႁူႁဝ်းၼႆႉသမ်ႉ တေလႆႈထွမ်ႇငိၼ်းဢဝ် ႁႂ်ႈမၼ်းတဵမ်တဵမ်လႄႈမိုတ်ႈ ၵိူတ်းၵၼ် ဢွၼ်တၢင်းၵွၼ်ႇ ယဝ်ႉႁဝ်းၸၢင်ႇၵႂႃႇ ၶၵ်ႉတွၼ်ႈဢၼ်ဝႃႈ ၵၢၼ်လၢတ်ႈ (Speaking) ၼႆၼၼ်ႉယဝ်ႉ။ ပေႃးဢမ်ႇမီးၵၢၼ်ထွမ်ႇဢွၼ်တၢင်း ၵႂႃႇဢဝ်ၵၢၼ်တႅမ်ႈ ၵၢၼ်ဢၢၼ်ႇ ဢွၼ်တၢင်းၼၼ်ႉ မၼ်းဢမ်ႇမေႃ မၼ်းတိုၼ်းဢမ်ႇႁူႉသင်ၼၼ်ႉယဝ်ႉ။

                        တူဝ်ယၢင်ႇမၼ်း မိူၼ်ၼင် ပၢႆးၿၺ်ႇၺႃႇ မိူင်းမၢၼ်ႈၼႆႉယဝ်ႉ လုၵ်ႉဢဝ်တီႈ ႁူင်းႁဵၼ်းၸၼ်ႉၼိုင်ႈထိုင် ၸၼ်ႉသိပ်း ထိုင်ပေႃးလႆႈၸုမ်ၶူးမႃး ၵမ်ႉပႃႇၼမ်ၼႆႉ လႆႈလူ (Reading) လႄႈ လႆႈတႅမ်ႈ (Writing) ၸွမ်းတၢင်းလင်ၶူးမၼ်းၵူၺ်း   ၵၢၼ်ထွမ်ႇ (Listening)လႄႈ ၵၢၼ်လၢတ်ႈ(Speaking) ၼႂ်းႁူင်းႁဵၼ်း ၼႂ်းႁွင်ႈႁဵၼ်းဢမ်ႇမီးလႄႈ ယဝ်ႉႁူင်းႁဵၼ်းမႃးၵေႃႈ မေႃလူႇမေႃဢၢၼ်ႇလၢႆလၢႆၵူၺ်းလႄႈ ဢမ်ႇႁူႉတီႈပွင်ႇမၼ်းၼၼ်ႉယဝ်ႉ။ ယွၼ်ႉၼၼ်ပေႃးၶႂ်ႈ ႁဵၼ်းႁူႉထႅင်ႈၽႃႇသႃႇၵႂၢမ်းလၢတ်ႈ ဢၼ်မႂ်ႇၼႆၸိုင် 1) တေလႆႈထွမ်ႇ (Listening)ဢွၼ်တၢင်း 2)တေလႆႈလၢတ်ႈ(Speaking) 3) တေလႆႈတႅမ်ႈ(Writing)  4) တေလႆႈလူ(Reading) ႁဵတ်းၼႆၵႂႃႇပဵၼ်ၶၵ်ႉပဵၼ်ၶၵ်ႉၼၼ်ႉယဝ်ႉ။ ၵၢၼ်ႁဵၼ်းၵၢၼ်သွၼ် ၽႃႇသႃႇၵႂၢမ်းလၢတ်ႈ ဢဝ်ၶၢဝ်းယၢမ်းပွတ်းပွတ်းၸိူင်ႉၼႆ ပိူၼ်ႈတေႁွင်ႉဝႃႈ ပီဢၢႆႇသီႇဢႅတ်ႉ  {BICS Basic Interpersonal Communication Skills} ၼႆၵမ်ႉပႃႇၼမ်ယဝ်ႉ။

• Academic Language

                        Academic Language ၼႆႉသမ်ႉ မၼ်းတေမီးၸၼ်ႉထၢၼ်ႇ မၼ်းတေပဵၼ် ၵၢၼ်ႁဵၼ်းၵၢၼ်သွၼ်ၶၢဝ်းယၢမ်း ၼိုင်ႈပီႊတေႃႇထိုင် သိပ်းပီႊၶိုၼ်ႈၼိူဝ်ၵေႃႈမီးယူႇ။ ပေႃးတေလၢတ်ႈတီႈပွင်ႇမၼ်းငၢႆႈငၢႆႈၵေႃႈ  ၵမ်ႉပႃႇၼမ် လုၵ်ႈဢွၼ်ႇႁဝ်း ဢၼ်ၶဝ်လုၵ်ႉမႃးၵၢင်ၼႂ်သေ ၵေႃႉပဵၼ်ပေႃးပဵၼ်မႄႈ သူင်ႇၵႂႃႇၶိုၼ်ႈႁူင်းႁဵၼ်းၵူႈဝၼ်းဝၼ်း ပီႊၼႆႉယူႇၸၼ်ႉ (5) ပီႊၼႃႈတေလႆႈၶိုၼ်ႈယူႇၸၼ်ႉ (6) ထႅင်ႈပီႊမႃးၼၼ်ႉသမ်ႉ ယူႇၸၼ်ႉ (7) ၵၢၼ်ႁဵၼ်းၵၢၼ်သွၼ် Academic ၼႆႉတေႉ မၼ်းတေလႆႈၸႂ်ႉၶၢဝ်းယၢမ်း ငိုၼ်းၵေႃႈတေမူတ်းၼမ် တေလႆႈယူႇၸွမ်းဢႃႇယုလႄႈ ၸၼ်ႉထၢၼ်ႇတမ်းဝၢင်းဝႆႉ။ ၶိုၼ်ႈႁဵၼ်းဢဝ် သွင်သၢမ်ပီႊၵူၺ်းမၼ်း တေဢမ်ႇယဝ်ႉလႆႈ မၼ်းတေလႆႈၸႂ်ႉၶၢဝ်းယၢမ်း ႁူဝ်သိပ်းပီႊမၼ်း။ 

                        ပေႃးႁဝ်းပဵၼ် ၽူႈၵွၼ်းႁူင်းႁဵၼ်း ပဵၼ်ၽူႈၵဵဝ်ႇၶွင်ၵၢၼ်ပၢႆးပၺ်ႇၺႃႇၼႆၸိုင် ႁဝ်းတေလႆႈႁူႉဝႃႈ ႁဝ်းတေဝၢင်းၽႅၼ်ပၼ်လုၵ်ႈဢွၼ်ႇၼေႃႇတႅၼ်းၶိူဝ်းႁဝ်းၼႆႉ ၶူးတေႃႇၵေႃႉၵေႃႈတေလႆႈႁူႉဝႃႈ ႁဝ်းတေသွၼ်ပၼ်လုၵ်ႈဢွၼ်ႇၼႆႉ တေသွၼ်ပၼ်ပဵၼ် လွၵ်းၵၢၼ်ႁဵၼ်းၵၢၼ်သွၼ် Academic ႁႃႉ ၵၢၼ်တႃႇၽိုၵ်းလၢတ်ႈ ၽႃႇသႃႇၵႂၢမ်းလၢတ်ႈ (Speaking) ႁႃႉ ၼႆပႃးၵၼ်ယူႇ။

                   ၵၢၼ်ႁဵၼ်းၵၢၼ်သွၼ် Academic ထႅင်ႈလွင်ႈၼိုင်ႈၵေႃႈ မၼ်းမီးၸၼ်ႉထၢၼ်ႇမၼ်းလႄႈ ပေႃးတေၵႂႃႇႁႃႁဵတ်းၵၢၼ်မႃး ဝႂ်ယဝ်ႉၸၼ်ႉထၢၼ်ႇမၼ်း ၸၼ်ႉလႂ်ၸၼ်ႉၼၼ်ႉ ပိူၼ်ႈတေလႆႈမီးပႃးၸွမ်းမိူၼ်ၵၼ်။ ပေႃးဢဝ်ပိူင်ပၢႆးပၺ်ႇၺႃႇ ၵူႈမိူင်းမိူင်းၸႂ်ႉတိုဝ်းဝႆႉ ဢၼ်ပဵၼ် 6/3/3 ၼၼ်ႉၼႆၸိုင်ႈ သင်လုၵ်ႈဢွၼ်ႇယဝ်ႉၸၼ်ႉငဝ်ႈယဝ်ႉတေလႆႈမီးဝႂ် သင်ယဝ်ႉၸၼ်ႉၵၢင်ယဝ်ႉၵေႃႈ တေလႆႈမီးဝႂ် သင်ယဝ်ႉၸၼ်ႉသုင် ယဝ်ႉၵေႃႈ တေလႆႈမီးဝႂ်ၽၢၼ်ႇပူၼ်ႉ သင်ယဝ်ႉၸၼ်ႉၸွမ်ၵေႃႈ တေလႆႈမီးဝႂ်ၸၼ်ႉၸွမ်ၼၼ်ႉပႃးမိူၼ်ၵၼ်ယူႇ။ လွၵ်းၵၢၼ်ႁဵၼ်းၵၢၼ်သွၼ် Academic ၼႆႉ ၵမ်ႉၼမ်ပိူၼ်ႈတေ ဢွၼ်ၵၼ်ႁွင်ႉဝႃႈ သီႇဢႄႇဢၢႆႇၽီႇ (CAIP - Cognitive Academic Language Proficiency) ၼႆၵၼ်ယူႇ။

• လၢႆးတမ်းၽႃႇသႃႇၽႃႇၼႂ်းႁူင်းႁဵၼ်း

                        ၵၢၼ်တမ်းၽႃႇသႃႇ Language and Subject တီႈၼႂ်းႁူင်းႁဵၼ်းၼႆႉၵေႃႈ လမ်လွင်ႈ လွင်ႈယႂ်ႇဝႆႉတေႉတေႉ ၼႂ်းၵၢၼ်တမ်းဝၢင်းၽႃႇသႃႇ ၵၢၼ်ႁဵၼ်းၵၢၼ်သွၼ်ႁဝ်းၼၼ်ႉ ႁဝ်းတေဢဝ်ၽႃႇသႃႇသင်ပဵၼ်လၵ်း တေဢဝ်ၵႂၢမ်းလၢတ်ႈသင်ပဵၼ်လၵ်းၼႆၵေႃႈလူဝ်ႇမီးမိူၼ်ၵၼ်ယူႇ။ ပေႃးပဵၼ်မိူၼ်ၼင်ႇမိူင်းသိင်ႇၵပူႇ (Singapore) ၶဝ်တေႉ ၶဝ်တေဢဝ် STEM (Science, Techology, English, Math) တမ်းပဵၼ်လၵ်းမၼ်း ပေႃးမႃး တူၺ်းပၢႆးပၺ်ႇၺႃႇၼႂ်း ၶွင်သီႊဢဝ်ၶိုၼ်းၸိုင်ႈတႆးသမ်ႉ ၶဝ်တေတမ်း TEM (Tai, English, Math) ပဵၼ်လၵ်းမၼ်း ပေႃးႁဝ်းႁူႉဝႃႈ ၽႃႇသႃႇဢၼ်လႆႈပဵၼ်လၵ်းလူင်မၼ်းၼႆၵေႃႈ ႁဝ်းၵေႃႈတေၸၢင်ႇလႆႈမႃးဝၢင်းၽႅၼ် လွၵ်းၶၢဝ်းယၢမ်း ၵၢၼ်သွၼ်ပၼ်တွၼ်ႈတႃႇၶူးသွၼ်မၼ်းၵႂႃႇယူႇ။

                        ၽူႈၵွၼ်းႁူင်းႁဵၼ်းလႄႈ ၽူႈပူၵ်းပွင်ပၢႆးပၺ်ႇၺႃႇမၼ်းတေလႆႈႁူႉလႄႈ တေလႆႈပွင်ႇၸႂ်လီလီဝႃႈ လၵ်းၵၢၼ် ၽႃႇသႃႇၵၢၼ်သွၼ်ႁဝ်းဢဝ်သင်ပဵၼ်လၵ်းဝႆႉ ယဝ်ႉၵေႃႈ ၽႃႇသႃႇထီႉၼိုင်ႈ ထီႉသွင်လႄႈ ထီႉသၢမ် (L1,L2,L3) ႁဝ်းပဵၼ်သင်ၼႆၵေႃႈ တေလႆႈႁူႉပွင်ၸႂ်လႆႈလီလီပႃး။ ပေႃးဢမ်ႇႁူႉပွင်ႇၸႂ်ၸႅင်ႈၸႅင်ႈလႅင်းလႅင်း လႆႈလီၼၼ်ႉ ပေႃးႁဵတ်းမႃး မၼ်းၸၢင်ႇမီးလွင်ႈယၢပ်ႇၽိုတ်ႇၼမ်လႄႈ ပၼ်ႁႃၼမ် လိုၼ်းသုတ်း လုၵ်ႈဢွၼ်ႇ ၵေႃႈဢမ်ႇထိုင်တီႈပၢႆ ဢမ်ႇထိုင်တီႈယွတ်ႈ။

                        ပေႃးပဵၼ်ၵၢၼ်ႁဵၼ်းၵၢၼ်သွၼ် ၵၢၼ်တမ်းဝၢင်းၽႃႇသႃႇ လွင်ႈ Academic ၼႆႉၸိုင်ႈ ပေႃးမႃးတူၺ်း ၸွမ်းၼင်ႇ ၵၢၼ်ပူၵ်းပွင်ၽႃႇသႃႇၵႂၢမ်းလၢတ်ႈၵႂႃႇပဵၼ်ၸၼ်ႉ (Language Development Stage) ၼႆၸိုင်ႈ ပေႃးႁဝ်းပဵၼ် ႁူင်းႁဵၼ်းၸိူဝ်ႉၸၢတ်ႈ ပဵၼ်ႁူင်းႁဵၼ်းတႆးၼႆၸိုင်ႈ ၶၵ်ႉထီႉၼိုင်ႈၵၢၼ်တမ်းဝၢင်းၽႃႇသႃႇၵၢၼ်သွၼ် တႄႇဢဝ်တီႈႁူင်းႁဵၼ်းၽၢၵ်ႇမႃးၼႆႉ ႁဝ်းတေလႆႈမီးၽႃႇသႃႇၵႂၢမ်းလၢတ်ႈမႄႈပဵၼ်လၵ်းမဵဝ်းလဵဝ်ၵူၺ်း ယွၼ်ႉဝႃႈ ၼႂ်းႁူင်းႁဵၼ်းၽၢၵ်ႇၼၼ်ႉၵမ်ႉၼမ်မၼ်းတေပဵၼ်လုၵ်ႈဢွၼ်ႇတိုၵ်ႉၽိုၵ်းၵူႈလွင်ႈလွင်ႈၶၵ်ႉတွၼ်ႈ Oral ၼၼ်ႉၶႃႈၼႃႇ သင်ထိုင်မႃးၼႂ်း KG2 ၼႆၸိုင် Pre/reading and pre/writing ပဵၼ်လၵ်းသေသွၼ်ၵႂႃႇၵူၺ်းၵေႃႈလႆႈယဝ်ႉ လိၵ်ႈတေႉဢမ်ႇပႆႇလူဝ်ႇ သွၼ်သင်တေႉတေႉ သင်ထိုင်မႃး ၸၼ်ႉဢွၼ်ႇၸၢင်ႇၶဝ်ႈလိၵ်ႈမႃးဢိတ်းဢိတ်း ၼႂ်းႁူင်းႁဵၼ်းၽၢၵ်ႇ KG1,KG2 ၼႆႉ တေလႆႈမီးၷၢၼ်တူင်ႉၼိုင်ၼမ်လိူဝ်သေ သွၼ်လိၵ်ႈ။

                        သင်ထိုင်မႃးၸၼ်ႉသွင်ႁဝ်းၸၢင်ႇဢဝ်မႃးသႂ်ႇၽႃႇသႃႇထီႉသွင်ၵေႃႈလႆႈယူႇ ယွၼ်ႉဝႃႈၶၵ်ႉတွၼ်ႈႁူင်းႁဵၼ်းၽၢၵ်ႇလႄႈ ၸၼ်ႉၼိုင်ႈၶဝ်လႆႈႁဵၼ်းႁူႉ ပုၼ်ႉၶၢမ်ႇမႃးၶၵ်ႉတွၼ်ႈ Oral,Pre/reading,Pre/Writing ၸိူဝ်းၼႆႉမႃးလီငမ်းယဝ်ႉ။ သင်ထိုင်ၸၼ်ႉသွင်မႃး လုၵ်ႈဢွၼ်ႇတွၼ်ႈတႃႇၶဝ်တေတႅမ်ႈပဵၼ်တူဝ်လိၵ်ႈၵေႃႈ မိုဝ်းၶဝ်မေႃယိပ်းၵမ်လီလီလႄႈ မေႃတႅမ်ႈၸွမ်းဢဝ်လီလီယဝ်ႉ ၼမ်ႉၵတ်ႉလႄႈ ၵၢၼ်သွၼ်ၼႆႉ မၢင်လွင်ႈမၼ်းၵူၺ်းလႆႈသွၼ်ပၼ်ၼိုင်ႈပွၵ်ႈၵူၺ်း မၼ်းဢမ်ႇလူဝ်ႇလႆႈ သွၼ်ပၼ်လၢႆလၢႆပွၵ်ႈၵေႃႈၶဝ်တွင်းလႆႈၵႂႃႇယဝ်ႉ။

                        ၵၢၼ်ပၢႆးပၺ်ႇၺႃႇၼႆႉ မၼ်းလမ်လွင်ႈ လွင်ႈယႂ်ႇတေႉတေႉ သင်ႁဝ်းဢမ်ႇႁူႉပွင်ႇၸႂ်မၼ်းလႆႈလီလီသေ လမ်းလိမ်းႁဵတ်းလူင်ၵႂႃႇၵူႈလွင်ႈၵေႃႈ မၼ်းတေဢမ်ႇလႆႈ ၵႂၢမ်းၽူႈမီးပၺ်ႇၺႃႇၶဝ်ၵႆႉၵႆႉလၢတ်ႈဝႃႈ သင်ၶႂ်ႈႁူႉဝႃႈ ဝၢၼ်ႈမိူင်းၼၼ်ႉ မိူဝ်းၼႃႈတေပဵၼ်မႃးၸိူင်ႉႁိုဝ်ၼႆ ႁၼ်တူၺ်းၼႃႈလုၵ်ႈဢွၼ်ႇ ၼေႃႇတႅၼ်းၶိူဝ်း ၼႂ်းဝၼ်းမိူဝ်ႈၼႆႉ ၼႆဝႆႉယူႇ။ ယွၼ်ႉၼၼ် ၶူးသွၼ် မေႃသွၼ်လႄႈ ၽူႈႁဵတ်းၵၢၼ်ပၢႆးပၺ်ႇၺႃႇၶဝ်ၼႆႉ ၶဝ်မီးပုၼ်ႈၽွၼ်းယႂ်ႇလူင်တေႉတေႉလႄႈ ႁၢပ်ႇၵၢၼ်ၼၵ်ႉလိူဝ်သေပိူၼ်ႈ တီႈပိူၼ်ႈႁဵတ်းၵူႈၵေႃႉဢမ်ႇပဵၼ်လႆႈၼၼ်ႉ ၶဝ်ႁၵ်ႉ ၶဝ်ႁဵတ်း ယွၼ်ႉၼၼ် ယႃႇပေထၢင်ႇလဵၵ်ႉၼမ်ႉၸႂ်မေႃသွၼ် ၶူးသွၼ်ၶဝ်ၼၼ်ႉလႃးလႃး. ၶူးသွၼ်လႄႈ မေႃသွၼ်ဢၼ်ဝႃႈၼႆႉ မၼ်းၵေႃႈမိူၼ် ၽူႈဢွၼ်ႁူဝ်လူင်ၵေႃႉၼိုင်ႈဝႆႉယူႇ။

• သႅင်သိုၵ်း
• www.saisengserk.com

Share:

Read More

MTB/MLE ၼႆႉပဵၼ်သင်?

                       ပေႃးပဵၼ်ၶူးသွၼ်လႄႈ ၽူႈႁဵတ်းၵၢၼ်ပၢႆးပၺ်ႇၺႃႇတေႉ ၵမ်ႉၼမ်တေဢွၼ်ၵၼ်ႁူႉယူႇဝႃႈ လွင်ႈ MTP/MLE ၼႆႉပဵၼ်သင်ၼႆ။ ပေႃးမႃးတူၺ်း ပၢႆးပၺ်ႇၺႃႇ ႁူဝ်ပၢၵ်ႇ 21 ၼႆႉၵေႃႈ ပိူၼ်ႈဢွၼ်ၵၼ်လၢတ်ႈ ၵၼ်ဝႃႈ ပၢႆးပၺ်ႇၺႃႇႁဝ်း လူဝ်ႇၸႂ်ႉလွၵ်းလၢႆး MTB/MLE သေ ပူၵ်းပွင်သွၼ်ပၼ် လုၵ်ႈဢွၼ်ႇၼေႃႇတႅၼ်းၶိူဝ်းႁဝ်းယူႇၼႆၵၼ် လူင်ႈၵႂႃႇၵူႈတီႈတီႈယူႇ။ လွၵ်းလၢႆး MTB/MLE ၼႆႉ  ၵမ်ႉၼမ် မၼ်းတေၵဵဝ်ႇၶွင်တီႈ ၽူႈႁဵတ်းၵၢၼ် ပူၵ်းပွင်ပႆၢးပၺ်ႇၺႃႇ ၸၢဝ်းၶိူဝ်းၵမ်ႉၼမ်  ၸၢဝ်းၶိူဝ်းၶဝ်ဢွၼ်ၵေႃႈ ဢွၼ်ၵၼ်ၸႂ်ႉတိုဝ်းၵၼ်ၼမ်မႃးလႄႈ ဢွၼ်ၵၼ်လၢတ်ႈမႃးၵၼ်ၵူႈဝၼ်းဝၼ်းယူႇ။ ပေႃးလၢတ်ႈဢဝ်ၵႂၢမ်းၵမ်းသိုဝ်ႈသိုဝ်ႈမၼ်းၼႆၸိုင်ႈ ဢဝ်လွၵ်းလၢႆးၽႃႇသႃႇၵႂၢမ်းလၢတ်ႈတူဝ်ၵဝ်ႇ ၵႂၢမ်းပေႃႈၵႂၢမ်းမႄႈပဵၼ်ယႂ်ႇသေ သွၼ်ဢဝ်ၼႆ ၵေႃႈဝႃႈလႆႈယူႇ။ MTB/MLE ၼႆႉပဵၼ်သင် တီႈပွင်ႇမၼ်းလူး ၶႂ်ႈဝႃႈသင်တေႉတေႉၼႆၸိုင် ပေႃးတေလဵပ်ႈႁဵၼ်းတူၺ်း လိုၵ်းလိုၵ်းၼႆၸိုင် မၼ်းပဵၼ်ၶေႃႈၵႂၢမ်းပွတ်းဢၢင်းၵိတ်း ၶေႃႈလႂ်ၶေႃႈၼၼ်ႉၵူၺ်း  MTB ပဵၼ်ႁင်းမၼ်းႁင်းၵူၺ်း MLE ၵေႃႈပဵၼ်ႁင်းမၼ်းႁင်းၵူၺ်း ၵူၺ်း။

• MTB (Mother Tongue Based)
• MLE (Multilingual Education)
• MTB/MLE (Mother Tongue Based Multilingual Education)

                        MTB/MLE ၼႆႉမၼ်းပဵၼ် ဢဝ်လၵ်း ၽႃႇသႃၵႂၢမ်းလၢတ်ႈပေႃႈၵႂၢမ်းလၢတ်ႈမႄႈႁဝ်းပဵၼ်ပိူင်ယႂ်ႇသေ သွၼ်ႁဵၼ်းလိၵ်ႈဢဝ်ၼႆယဝ်ႉ။ တူဝ်ယၢင်ႇမၼ်း သင်ႁဝ်းၵိူတ်ႇပဵၼ်တႆး ၵေႃႉပဵၼ်ပေႃႈပဵၼ်မႄႈႁဝ်း ၼႂ်းႁိူၼ်း ၼႂ်းယႄးႁဝ်း ဢွၼ်ၵၼ်လၢတ်ႈၵႂၢမ်းတႆးၼႆ ၵေႃႉပဵၼ်ႁဝ်း ၵိူတ်ႇမႃးၼႂ်းတူင်ႇဝူင်းၼၼ်ႉ ၶိုၼ်းတေလႆႈသိုပ်ႇၵၼ် လၢတ်ႈၵႂႃႇၵႂၢမ်းတႆးၼၼ်ႉယဝ်ႉ။ တူဝ်ၸဝ်ႈၵဝ်ႇတေၸႃႉမေႃၵႂၢမ်းလၢတ်ႈ ဢၼ်လႂ်ၵေႃႈ ၽႃႇသႃၼၼ်ႉ ပဵၼ်ၽႃႇသႃၵႂၢမ်းလၢတ်ႈပေႃႈႁဝ်းမႄႈႁဝ်းၼႆယဝ်ႉ။

                        ပေႃးတေမႃးတူၺ်း ၼႂ်းငဝ်းလၢႆးတႆးႁဝ်းၼႆၸိုင် ဢိင်ၼိူဝ်ငဝ်းလၢႆးၵူႈလွင်ႈလွင်ႈသေ ၵမ်ႉပႃႈၼမ်ဢွၼ်ၵၼ်ပၢႆႈၶဝ်ႈမႃးယူႇၼႂ်းမိူင်းထႆးလႄႈ သမ်ႉမႃးတႄႇၼႃႈႁိူၼ်းၸွမ်းၵၼ် ၵေႃႉပဵၼ်ပေႃႈပဵၼ်မႄႈၵေႃႈပဵၼ်တႆးလၢတ်ႈၵႂၢမ်းတႆးၵၼ်ယူႇ လိုၼ်းသုတ်းမီးလုၵ်ႈ လၢင်းမႃးၵၼ်ယဝ်ႉ သမ်ႉဢဝ်လုၵ်ႈလၢင်းႁဝ်းၵႂႃႇဝႆႉႁူင်းႁဵၼ်းထႆး ၶိုၼ်ႈႁဵၼ်းလိၵ်ႈထႆးၵႂႃႇယဝ်ႉၼႆၸိုင်ႈ ၽႃႇသႃၵႂၢမ်းလၢတ်ႈ ဢၼ်ၼႂ်းႁိူၼ်းၼႂ်းၼႃႈႁိူၼ်းၶဝ်ၼၼ်ႉၵေႃႈ လၢတ်ႈတေႃႇၵၼ် ၽၢႆႇထႆးၵႂႃႇပႅတ်ႈ  ယဝ်ႉၵေႃႉပဵၼ်ပေႃႈပဵၼ်မႄႈၵေႃႈ ဢမ်ႇၵႆႉၵႆႉလၢတ်ႈတေႃႇၵၼ်ၽၢႆႇတႆး လုၵ်ႈၶဝ်ၵႂႃႇႁူင်းႁဵၼ်းမႃး ႁဵတ်းၵေႃႉဢူၺ်းၵေႃႉထႆး သမ်ႉလၢတ်ႈၵႂၢမ်းထႆး ထိုင်ႁိူၼ်းမႃးယဝ်ႉ တွၼ်ႈတႃႇ လုၵ်ႈလၢင်းႁႂ်ႈၶိုတ်းၸၼ်ႉၼႆသေ သမ်ႉလၢတ်ႈတေႃႇၵၼ် ၵပ်းသိုပ်ႇၵပ်းသၢၼ်တေႃႇၵၼ် ၽၢႆႇၵႂၢမ်းထႆးၵူၺ်းၼႆၸိုင် ၽႃႇသႃၵႂၢမ်းလၢတ်ႈ လုၵ်ႈဢွၼ်ႇၶဝ် ဢၼ်ၵိူတ်ႇမႃးလႄႈ တႄႇမေႃလၢတ်ႈဢွၼ်တၢင်းၼၼ်ႉ ပဵၼ်ၵႂၢမ်းထႆးၵႂႃႇယဝ်ႉၼႆၸိုင် ၼၼ်ႉမၢႆထိုင်ဝႃႈ ၽႃႇသႃႇၵႂၢမ်းလၢတ်ႈမႄႈလုၵ်ႈဢွၼ်ႇၵေႃႉၼၼ်ႉပဵၼ်ထႆးၵႂႃႇပႅတ်ႈယဝ်ႉ တေဢမ်ႇၸႂ်ႈၵႂၢမ်းတႆး။

                        ပေႃးတေၸႂ်ႉတိုဝ်း ၽႃႇသႃႇၵႂၢမ်းလၢတ်ႈ MTB/MLE ပဵၼ်လၵ်းပဵၼ်ယႂ်ႇၼႆၸိုင် တေလႆႈႁူႉ တေလႆႈမီးယူႇ (5) မဵဝ်းယဝ်ႉ ၸၢင်ႇၵွႆႁွင်ႉဝႃႈပဵၼ် လွၵ်းလၢႆးသွၼ်လၢႆးႁဵၼ်း လၢႆးႁူႉ MTB/MLE ၼႆယူႇ

1. Learned First: (မိူဝ်ႈဢမ်ႇပႆႇဢွၵ်ႇႁိူၼ်း ႁူႉၽႃႇသႃႇၵႂၢမ်းလၢတ်ႈၼႂ်းႁိူၼ်း)
2. Identifies with: (ႁူႉၸၵ်းတူဝ်ၵဝ်ႇလီလႄႈ မၵ်ႉမၼ်ႈလႆႈဝႃႈပဵၼ်ၵႂၢမ်းၼႂ်းႁိူၼ်း)
3. Knows best: (လူတ်ႉလႅၼ်ႇႁူႉထီႉသုတ်း ၼႂ်းၽႃႇသႃႇၵႂၢမ်းလၢတ်ႈ)
4. Uses most: (ၸႂ်ႉတိုဝ်းၵႂၢမ်းလၢတ်ႈၼႂ်းႁိူၼ်းၼမ်ထီႉသုတ်း ၸွမ်းဢူၺ်းၵေႃႉ)
5. Speaks and understands competently (လၢတ်ႈလႆႈ ပွင်ၸႂ်လႆႈ ၵႂၢမ်းလၢတ်ႈၼႂ်းႁိူၼ်း လႆႈလီလႄႈ တႅမ်ႈလႆႈပႃး)

                        ပေႃးႁူႉ ပေႃးမေႃလူတ်ႉလႅၼ်ႇ တဵမ်ထူၼ်ႈ (5)လွင်ႈၼႆႉယဝ်ႉ ၸၢင်ႇၵွႆႇမၵ်ႉမၼ်ႈလႆႈဝႃႈ ပဵၼ် MTB/MLE ၼႆယဝ်ႉ။ သင်ဝႃႈ ပူႇၼၢႆး ပေႃႈမႄႈ ပဵၼ်တႆးယူႇ ၵူၺ်းဢမ်ႇမေႃၵႂၢမ်းတႆး လိၵ်ႈတႆး ဢမ်ႇႁူႉၵႂၢမ်း တႆးၼႆၸိုင် ဢမ်ႇပႆႇမၵ်ႉမၼ်ႈလႆႈဝႃႈပဵၼ် MTB/MLE လႆႈ လွၵ်းလၢႆး MTB/MLE ၼႆႉ မၼ်းပဵၼ် လွၵ်းလႆၢးႁႄႉၵင်ႈ ၶိူဝ်းၵူၼ်းၼိုင်ႈဢၼ်ၼႆၵေႃႈဝႃႈလႆႈယူႇ ။

                        လွၵ်းလၢႆးၸႂ်ႉ MTB/MLE ပဵၼ်လၵ်းသေ သွၼ်လုၵ်ႈဢွၼ်ႇၼႆႉ မၼ်းၶိုၵ်ႉၶႅမ်ႉတွၼ်ႈတႃႇ လုၵ်ႈဢွၼ်ႇၸၢဝ်းၶိူဝ်းလဵၵ်ႉလဵၵ်ႉၶဝ်တေႉတေႉဝႃႈဝႃႈယဝ်ႉ။ သင်ဝႃႈ လုၵ်ႈဢွၼ်ႇၵေႃႉၼၼ်ႉ မေႃၵႂၢမ်းတႆး ပေႃႈပဵၼ်တႆးမႄႈၵေႃႈပဵၼ်တႆး လုၵ်ႈလၢင်းၶဝ်ၵေႃႈ မေႃလိၵ်ႈတႆးၵႂၢမ်းတႆးႁူႉၸၵ်းတူဝ်ၵဝ်ႇလီလီယဝ်ႉၼႆၸိုင် တွၼ်ႈတႃႇ လုၵ်ႈဢွၼ်ႇၵေႃႉၼၼ်ႉ တေၶဝ်ႈႁဵၼ်းထႅင်ႈ ၽႃႇသႃႇၵႂၢမ်းလၢတ်ႈထႅင်ႈထီႉသွင် (Second Language L2) ဢၼ်ဝႃႈၼၼ်ႉမၼ်းငၢႆႈငၢႆႈဢွၼ်ႇၵူၺ်းယဝ်ႉ တွၼ်ႈတႃႇတေ ႁူႉ မေႃႈလၢတ်ႈၽႃႇသႃႇၵႂၢမ်းလၢတ်ႈမႂ်ႇမႂ်ႇထီႉသွင်သၢမ်ၵႂႃႇလႆႈလီထႅင်ႈၼၼ်ႉ ႁဝ်းတေလႆႈႁူႉပွင်ၸႂ် ၽႃႇသႃႇၵႂၢမ်းလၢတ်ႈမႄႈႁဝ်း ဢွၼ်တၢင်းၵွၼ်ႇ။

                        ၵၢပ်ႈယၢမ်းလဵဝ်ၼႆႉ လုၵ်ႈဢွၼ်ႇၼိုင်ႈၵေႃႉ လၢတ်ႈလႆႈ (6)ၽႃႇသႃႇ (7)ၽႃႇသႃႇ ၸိူဝ်းၼႆႉ ယွၼ်ႉငဝ်ႈၶၢမ်ႇပိုၼ်ႉ MTB/MLE ၶဝ် မၼ်းၶိုၵ်ႉၶႅမ်ႉလႄႈ ၶဝ်ၸၢင်ႈလၢတ်ႈလႆႈ ႁဵတ်းလႆႈမႃးတၼ်ႇၼၼ်ႉယဝ်ႉ။ တူဝ်ယၢင်ႇမၼ်း မိူၼ်ၼင်ႇ တီႈၶႃႈၶဝ်ယၢမ်ႈ ၶိုၼ်ႈႁဵၼ်းမႃးတီႈ ဝဵင်းလႃႈသဵဝ်ႈပွၵ်ႈ (12) တေပဵၼ်ပွၵ်ႉတႆး ႁူဝ်ၵူၼ်းတႆးၼမ်သေပိူၼ်ႈ တီႈႁိမ်းၶၢင်ႈၶႃႈၶဝ်ယူႇ မီးႁိမ်းႁိူၼ်းႁဝ်းၼၼ်ႉ တေမီးပီႈၼွင်ႉလွႆ ၶဝ်ၵေႃႈမႃးၶိုၼ်ႈႁူင်းႁဵၼ်းလူင်ပွင်ၸိုင်မၢၼ်ႈမိူၼ်ၵၼ် ၵူၺ်းၼႃႈႁိူၼ်းၶဝ်တၢင်းႁိူၼ်းမႃးယူႇၼႂ်းၵႄႈတႆးလႄႈ ၵမ်ႉၼမ်လုၵ်ႈလၢင်းၶဝ်ၵေႃႈ ယႂ်ႇၶိုၼ်ႈမႃးၸွမ်း ၼႂ်းတူင်ႇဝူင်းတႆးၵူၺ်းလႄႈ ဢွၼ်ၵၼ်လၢတ်ႈတေႃႇၵႂၢမ်းတႆးၵူၺ်း လုၵ်ႈလၢင်းၶဝ်ၼၼ်ႉ ဢမ်ႇမေႃၵႂၢမ်းလွႆ ဢမ်ႇမေႃလိၵ်ႈလွႆလႄႈ ၵမ်ႉၼမ်မေႃလၢတ်ႈၵႂၢမ်းတႆးလိၵ်ႈတႆး လူၼ်ႉလႅၼ်ၵူၺ်းလႄႈ ၽႃႇသႃႇၵႂၢမ်းလၢတ်ႈမႄႈၶဝ် ထီႉၼိုင်ႈ (L1) ၼၼ်ႉ ဢဝ်ပဵၼ်ၵႂၢမ်းတႆးၵႂႃႇပႅတ်ႈၵေႃႈမီးယူႇ။  MTB/MLE ၼႆႉမၼ်းဢမ်ႇၸႂ်ႈ တွၼ်ႈတႃႇ ဢူမ်ဢိုၼ်ၵိၼ်ၶိူဝ်းဢွၼ်ႇ  မၼ်းၵူၺ်းပဵၼ်ၵၢၼ်ထိင်းသိမ်းလိၵ်ႈလၢႆးလႄႈ ၶိူဝ်းၵူၼ်း ဢိင်ႇပႃးၾိင်ႈငႄႈၾိင်ႈထုင်းႁဝ်းၵူၺ်း ထႅင်ႈလွင်ႈၼိုင်ႈၵေႃႈ မၼ်းတေႁဵတ်းႁႂ်ႈလုၵ်ႈဢွၼ်ႇႁဝ်း ႁဵၼ်းႁူႉလႆႈလိၵ်ႈတၢင်ႇၸၢဝ်းၶိူဝ်းလႆႈဝၢႆးပႃး။

• ပိုၼ်းပဵၼ်မႃး MTB/MLE

                           ပိုၼ်းတီႈလႆႈပဵၼ်မႃး လွၵ်းလၢႆးဢဝ်ၽႃႇသႃႇၵႂၢမ်းလၢတ်ႈမႄႈပဵၼ်လၵ်းသေသွၼ်ၼႆႉ မၼ်းတႄႇမႃးတီႈ မိူင်းဢမႄႇရိႇၵၼ်ႇ (American) ယွၼ်ႉပိူဝ်ႈဝႃႈ မိူင်းဢမႄႇရိႇၵၼ်ႇၶဝ်ၼႆႉ မီးၸၢဝ်းၶိူဝ်းၼမ် မီးၵူၼ်းယၢၼ်မိူင်းၼမ် မီးၵူၼ်းထူပ်းၽႄးၼမ်လႄႈ ၸၢဝ်းၶိူဝ်းၼမ်သေပိူၼ်ႈၼႂ်းၵမ်ႇႈၾႃႇၼႆႉ။

မီးယူႇဝၼ်းၼိုင်ႈ ၽူႈႁဵတ်းၵၢၼ်ပၢႆးပၺ်ႇၺႃႇ သွင်ၵေႃႉၽူဝ်မႄးၸိုဝ်ႈတေႃးမတ်ႉသၼ်ႇတႃလႄႈ ၶေႃႇလႃႇ (Thomas and Collier) ယွၼ်ႉပိူဝ်ႈဝႃႈမိူင်းဢမႄႇရိႇၵၼ်ႇ (American) ၼႆႉ  ၶဝ်ဢွၼ်ၵၼ်ၸႂ်ႉတိုဝ်းၽႃႇသႃႇၵႂၢမ်းလၢတ်ႈ ဢၢင်းၵိတ်းပဵၼ်လၵ်းၵူၺ်းလႄႈ သွၼ်ၵႂႃႇၸွမ်းပိူင်ၵၢၼ်ႁဵၼ်းၵၢၼ်သွၼ်ၶဝ်ၵူၺ်းသေ တွၼ်ႈတႃႇ လုၵ်ႈဢွၼ်ႇဢၼ်ၵိူတ်ႇမႃးၼႂ်းမိူင်းဢမႄႇရိႇၵၼ်ႇလႄႈ ဢၼ်ၼႂ်းၶိူဝ်းႁိူၼ်းၶဝ် လၢတ်ႈတေႃႇၵၼ်ၵႂၢမ်းဢၢင်းၵိတ်ႉၵႂၢမ်းဢမႄႇရိႇၵၼ်ႇ ၵူႈဝၼ်းဝၼ်းၼၼ်ႉတေႉ  တေဢမ်ႇမီးပၼ်ႁႃသင်ၼင်ႇၵဝ်ႇ တွၼ်ႈတႃႇ  ၵူၼ်းယၢၼ်မိူင်းၶဝ် ၵူၼ်းပၢႆႈၽႄးၶဝ်ၸိူဝ်း ၶဝ်ႈမႃးယူႇထၢင်ႈသဝ်း မိူင်းဢမႄႇရိႇၵၼ်ႇၶဝ်ၼၼ်ႉသမ်ႉ  တႃႇတေႁဵၼ်းဢဝ်လႆႈ ၽႃႇသႃႇၵႂၢမ်းလၢတ်ႈ ဢၢင်းၵိတ်ႉလႆႈလီၼႆႉ မီးလွင်ႈယၢပ်ႇ ၵိၼ်းႁႅင်းဝႆႉတေႉတေႉယူႇ။

                        ဝၼ်းၼိုင်ႈၶႃႈသွင်ၵေႃႉၽူဝ်ႇမႄး မီးလွင်ႈဢမ်ႇၶဝ်ႈၸႂ်ၵၼ် ဢမ်ႇႁၼ်လီၼိူဝ် ပၢႆးဝူၼ်ႉၵၼ်လႄႈ သွင်ၵေႃႉၽူဝ်ႇမႄး ၸွမ်းၼင်ႇၽူႈမီးပၺ်ႇၺႃႇၼၼ်ႉလႄႈ မီးမႃႇၼတေႃႇၵၼ် ဢမ်ႇၶႂ်ႈယွမ်းႁပ်ႉၵၼ်လႄႈ ၵဝ်ႇၵေႃႈဝႃႈၵဝ်ႇမႅၼ်ႈလႄႈ မႂ်းၵေႃႈဝႃႈမႂ်းမႅၼ်ႈ ၵူၺ်းၶႃႈသွင်ၵေႃႉၽူဝ်ႇမေးသမ်ႉ ဢမ်ႇဢဝ်သူပ်းဢဝ်ၵႂၢမ်းသေထိင်ၵၼ်မေႃးၵၼ်  တွၼ်ႈတႃႇတေႁူႉဝႃႈ တၢင်းႁၼ်ထိုင်ၶႃႈသွင်ၵေႃႉၽူဝ်ႇမႄး ၽႂ်တေထုၵ်ႇတေမႅၼ်ႈမၢၼ်ႇ ၼႆၼၼ်ႉ တေလႆႈမီးသၵ်ႇသေႇၼႆယူႇ။

                        ၵေႃႉပဵၼ်မႄးမၼ်းၼၼ်ႉဝူၼ်ႉႁၼ်ထိုင်ၼိူဝ်လုၵ်ႈဢွၼ်ႇၵဵဝ်ႇလူၺ်ႈၵၢၼ်ပႆၢးပၺ်ႇၺႃႇ ၵၢၼ်ႁဵၼ်းလိၵ်ႈလၢႆးၼႆႉ တႃႇလုၵ်ႈဢွၼ်ႇႁဵၼ်းၸိူဝ်းဢၼ်ဢမ်ႇၸႂ်ႈၶိူဝ်းဢမႄႇရိႇၵၼ်ႇၶဝ် တေလႆႈႁဵၼ်းႁူႉဢဝ်လႆႈလိၵ်ႈ ဢၢင်းၵိတ်းလႆႈလီလီ ၸွမ်းလႆႈလိၵ်ႈလီလီၼၼ်ႉ ၶဝ်တေလႆႈႁူႉပွင်ၸႂ်ၽႃႇသႃႇၵႂၢမ်းလၢတ်ႈတူဝ်ၵဝ်ၶဝ် ၽႃႇသႃၵႂၢမ်းလၢတ်ႈၶိူဝ်းႁိူၼ်း (Mother Language) ၶဝ်ဢွၼ်တၢင်းၵွၼ်ႇ  ဢၼ်ၶဝ်လၢတ်ႈတေႃႇၵပ်းသိုပ်ႇၵပ်းသၢၼ်ႇၵၼ်ၵူႈဝၼ်းဝၼ်းၼၼ်ႉပဵၼ်ၽႃႇသႃႇၵႂၢမ်းလၢတ်ႈသင်ၼႆတေလႆႈႁူႉပွင်ႇၸႂ် လီလီယဝ်ႉၵွၼ်ႇ ၶဝ်ၸၢင်ႈတေမႃးႁူႉပွင်ၸႂ် သွၼ်ႁဵၼ်းဢဝ်ၽႃႇသႃႇၵႂၢမ်းလၢတ်ႈ လိၵ်ႈဢၢင်းၵိတ်း (Second Language L2) လႆႈလီလီၼႆယူႇ။

                        ၵေႃႉပဵၼ်ၽူဝ်မၼ်းၼၼ်ႉတေႉ ဢမ်ႇယွမ်းႁပ်ႉတီႈတၢင်းႁၼ်ထိုင်မႄးမၼ်းလၢတ်ႈ ၽူဝ်မၼ်းတေႉဝႃႈ ပိူင်ၵၢၼ်ႁဵၼ်းၵၢၼ်သွၼ်မိူင်းဢမႄႇရိႇၵၼ်ႇၼႆႉ မၼ်းၶႅမ်ႉလီၼႃႇယဝ်ႉ သွၼ်ၵႂႃႇၸွမ်းပိူင်ၵၢၼ်ပၢႆးပၺ်ႇၺႃႇဢဝ် သင်ၶဝ်မီးဢႃႇယု (3) ၶူပ်ႇမႃး မႃးၽၵ်ႇဝႆႉတီႈႁူင်းႁဵၼ်းၽၢၵ်ႇသေ ၶိုၼ်ႈႁဵၼ်းၵႂႃႇၸွမ်းၶၵ်ႉလႂ်ၶၵ်ႉၼၼ်ႉ တွၼ်ႈလႂ်တွၼ်ႈၼၼ်ႉလႄႈ ၸၼ်ႉလႂ်ၸၼ်ႉၼၼ်ႉ တေႃႇပေႃးထိုင်ၸၼ်ႉၸွမ်ၵေႃႈ ၶဝ်တိုၼ်းႁူႉမေႃပွင်ၸႂ်လၢတ်ႈလႆႈၽႃႇသႃႇ ၵႂၢမ်းဢၢင်းၵိတ်ႉလႆႈလႆႈလီယဝ်ႉ ဢမ်ႇတၢပ်ႇလူဝ်ႇႁူႉၵႂၢမ်းလၢတ်ႈပေႃႈမႄႈ လူတ်ႉလႅၼ်ႇၵႂၢမ်းလၢတ်ႈပေႃႈမႄႈသင် လူင်လၢင်တေႉတေႉၼႆယူႇ။

                        လိုၼ်းသုတ်း ၸဝ်ႈမီးပၺ်ႇၺႃႇတၢင်းသွင်ၵေႃႉၽူဝ်မႄး ဢမ်ႇယွမ်းႁပ်ႉၵၼ် ဢမ်ႇႁၼ်လီပၢႆးဝူၼ်ႉၵၼ်လႄႈ တွၼ်ႈတႃႇ တေဢဝ်ပႄႉပုၼ်ႈၵၼ်လႆႈၼၼ်ႉ တေလႆႈလူင်းႁဵတ်းႁႃၶေႃႈမုၼ်းလႄႈ မီးသၵ်ႇသႄႇတေႉတေႉဝႃႈဝႃႈယူႇ။ တွၼ်ႈတႃႇ ၶဝ်တေလူင်းၵဵပ်းႁႃၶေႃႈမုၼ်း (Advance) လႆႈမႃးသၵ်ႉသႄႇလႆႈတဵမ်တဵမ်ထူၼ်ႈထူၼ်ႈၼၼ်ႉ  လႆႈၸႂ်ႉၶၢဝ်းယၢမ်း ႁဵတ်းၵၢၼ်ၶူၼ်ႉၶႂႃႉမႃးၶၢဝ်းတၢင်း (10)ပီႊပၢႆၵႂႃႇယူႇ  လုၵ်ႉဢဝ်တီႈလုၵ်ႈႁဵၼ်းတၢင်းၸၼ်ႉ တႄႇၸၼ်ႉႁူင်းႁဵၼ်းၽၢၵ်ႇထိုင် ယဝ်ႉၸၼ်ႉၵၢင်ၼၼ်ႉ ၶဝ်လႆႈပႂ်ႉတူၺ်း ႁဵတ်းၵၢၼ်ၶူၼ်ႉၶႂႃႉမႃးတေႉတေႉလႄႈ ၸၢင်ႇလႆႈႁူႉၶေႃႈတွပ်ႈမၼ်းမႃး။

                        ၼႂ်းၶၢဝ်းတၢင်း (10)ပီႊပၢႆ တၢင်းသွင်ၵေႃႉၽူဝ်ႇမႄးလႆႈႁဵတ်းၵၢၼ် ၶူၼ်ႉၶႂႃႉမႃးႁူမ်ႈတၢင်းမူတ်းမီးယူႇႁူင်းႁဵၼ်း လင်ပွင်း (200)ပၢႆသေ လိုၼ်းသုတ်းမႃး ပႆၢးဝူၼ်ႉၶေႃႈႁၼ်ထိုင်မႄးမၼ်းလၢတ်ႈၼၼ်ႉ ဢဝ်ထုၵ်ႇမႅၼ်ႈၵႂႃႇပႅတ်ႈလႄႈ ၼႂ်းၶၢဝ်းတၢင်း (10)ပီႊပၢႆၼႆႉ ပၼ်တီႈႁူင်းႁဵၼ်းၽၢၵ်ႇထိုင် ၸၼ်ႉ (3) သွၼ်ပၼ်သႂ်ႇပၼ်ပႃး ၽႃႇသႃႇၵႂၢမ်းလၢတ်ႈမႄႈ (Mother Language L1)ၶဝ် ဢၼ်ၶဝ်ၸႂ်ႉတိုဝ်းၵၼ်တီႈႁိူၼ်းၼၼ်ႉၵူႈဝၼ်းဝၼ်း ႁႂ်ႈၶဝ်ႁူႉၸၵ်းတီႈပွင် ၼႂ်းၽႃႇသႃႇၵႂၢမ်းလၢတ်ႈၶဝ်ၼၼ်ႉလီလီယဝ်ႉ ထိုင်မႃးၸၼ်ႉ (4)မႃး ၸၢင်ႇဢဝ်ၽႃႇသႃႇဢၢင်းၵိတ်ႉ ၽႃႇသႃႇၵႂၢမ်းလၢတ်ႈထီႉသွင် (Second Language L2 ) ၶဝ်ႈမႃးၸွမ်း. ဝၢႆးလင် ႁဵတ်းၼၼ်သေ လိုၼ်းသုတ်းမႃး ၼႂ်းၶၢဝ်းတၢင်း (10)ပီႊပၢႆ လုၵ်ႈဢွၼ်ႇတီႈ ပၼ်သုၼ်ၶဝ်ႁဵၼ်းႁူႉ ႁူႉပွင်ၽႃႇသႃႇၵႂၢမ်းလၢတ်ႈမႄႈၶဝ်မႃးလႆႈလီလီၼၼ်ႉ ၵိုၵ်ႉၵၢင်ႉၶိုၼ်ႈမႃးသေ ၼမ်ႉၵတ်ႉလုၵ်ႈဢွၼ်ႇၸိူဝ်းၼၼ်ႉ ပူၼ်ႉၵႂႃႇပႅတ်ႈ ၵူၼ်းပိုၼ်ႉတီႈ မိူင်းဢမႄႇရိႇၵၼ်ႇၵႂႃႇယူႇ။

                        လွၵ်းလၢႆးဢဝ်ၽႃႇသႃမႄႈ (MTB/MLE) သေသွၼ်ၼႆႉ မၼ်းၶႂ်ႈပဵၼ် တွၼ်ႈတႃႇထိင်းသိမ်းၽႃႇသႃႇၵႂၢမ်းလၢတ်ႈတူဝ်ၸဝ်ႈၵဝ်ႇ ၊ ၾိင်ႈငႄႈၾိင်းထုင်းလႄႈ လိၵ်ႈလၢႆးႁဝ်း ယႃႇႁႂ်ႈမၼ်းႁၢႆၼၼ်ႉၵူၺ်း။ တွၼ်ႈတႃႇ ၽူႈၵွၼ်းႁူင်းႁဵၼ်း ၽူႈႁဵတ်းၵၢၼ် ပၢႆးပၺ်ႇၺႃႇႁဝ်းၶႃႈၶဝ်ၵေႃႈ ထုၵ်ႇလီလဵပ်ႈႁဵၼ်း ႁဵၼ်းႁူႉဝႆႉပႃးလွင်ႈၼႆႉပႃးၵၼ်ယူႇ။

• လွၵ်းၽႅၼ်ၽႃႇသႃႇၵႂၢမ်းလၢတ်ႈ (Language Progression Plan)

                        ပေႃးပဵၼ်ၽူႈၵွၼ်းႁူင်းႁဵၼ်း ၶူးပူင်သွၼ် ဢမ်ႇၼၼ် ၽူႈႁဵတ်းၵၢၼ်ပၢႆးပၺ်ႇၺႃႇၼႆၸိုင် တေလႆႈမီးလွၵ်းၽႅၼ်ၽႃႇသႃႇၵႂၢမ်းလၢတ်ႈႁင်းၽႂ်မၼ်းယူႇ ပေႃးဢမ်ႇမီးၼႆ လုၵ်ႈဢွၼ်ႇယဝ်ႉၸၼ်ႉၵႂႃႇလၢႆလၢႆၵူၺ်းလႄႈ ၼမ်ႉၵတ်ႉတၢင်းၶႅၼ်လႄႇ ၽႃႇသႃႇၵႂၢမ်းလၢတ်ႈထီႉသွင် ထီႉသၢမ်ႇၶဝ်ၸိူဝ်းၼၼ်ႉၵေႃႈ တေဢမ်ႇၶိုၼ်ႈမႃး။

                        သင်ဝႃႈ ၼႂ်းၸုမ်းႁဝ်း တေဢွၼ်ၵၼ်ၸႂ်ႉတိုဝ်း လွၵ်းလၢႆးဢဝ်ၽႃႇသႃၵႂၢမ်းလၢတ်ႈမႄႈ (MTB/MLE) သေသွၼ်ၼႆၸိုင် တေလႆႈမီးလွၵ်းၽႃႇသႃႇၵၢၼ်သွၼ်ပိုၼ်ႉတီႈ (Language Map) ဢွၼ်တၢင်းၵွၼ်ႇ လွၵ်းၽႃႇသႃႇၵၢၼ်သွၼ်ၼႂ်းပိုၼ်ႉတီႈၼႆႉသမ်ႉ မၼ်းလမ်လွင်ႈ လွင်ႈယႂ်ႇတွၼ်ႈတႃႇ ႁဝ်းတေလႆႈႁူႉဝႃႈ ပိုၼ်ႉတီႈလႂ် ဝဵင်းလႂ် ဝၢၼ်ႈလႂ်မီး ၸၢဝ်းၶိူဝ်းသင်ယူႇသဝ်း ဝၢၼ်ႈလႂ်မီးၸၢဝ်းၶိူဝ်းၼမ်လႄႈ တႆးၼမ် တေလႆႈႁူႉသေ မီးၼႂ်းလွၵ်းၽႅၼ်ၽႃႇသႃႇၵႂၢမ်းလၢတ်ႈႁဝ်း တႃႇသေႇယူႇ။ ပေႃးတေ ႁဵတ်းလႄႈ ၸႂ်ႉတိုဝ်း လွၵ်းလၢႆးၵၢၼ်သွၼ်ဢဝ်ၽႃႇသႃႇမႄႈပဵၼ်လၵ်း (MTB/MLE) သေသွၼ်ၼႆၸိုင် ၶေႃႈမုၼ်းၼႂ်းမိူင်းတႆးႁဝ်း ၼႂ်းပိုၼ်ႉတီႈႁဝ်း တီႈႁူင်းႁဵၼ်းႁဝ်း ပၵ်းယူႇသဝ်းဝႆႉၼၼ်ႉ မီးၸၢဝ်းၶိူဝ်းသင်လၢႆလၢႆ ၶဝ်လၢတ်ႈၵႂၢမ်းသင်လၢႆလၢႆၼႆၵေႃႈ တေလႆႈမီးၶေႃႈမုၼ်းဝႆႉပႃးယူႇ။ ႁဝ်းသမ်ႉဝႃႈ ႁဝ်းၸႂ်ႉတိုဝ်းလွၵ်းလၢႆး ဢဝ်ၽႃႇသႃႇၵႂၢမ်းလၢတ်ႈမႄႈပဵၼ်လၵ်းသေသွၼ်ၼႆသေ သမ်ႉတေၵႂႃႇတဵၵ်ႉၽႃႇသႃႇၵႂၢမ်းလၢတ်ႈပိူၼ်ႈၵေႃႈ ဢမ်ႇပႆႇမႅၼ်ႈၼင်ႇၵဝ်ႇ။

• ၽႃႇသႃႇထီႉသွင်တေၶဝ်ႈမိူဝ်ႈလႂ် (Second Languages)

                        ၽူႈယႂ်ႇ ၊ ၽူႈၵွၼ်း ၊ ၽူႈမီးပုၼ်ႈၽွၼ်း ၼႂ်းပၢႆးပၺ်ႇၺႃႇ တေလႆႈဝၢင်းၽႅၼ်ယဝ်ႉၼႆႉ ဝႃႈသင်ထိုင်မႃးၸၼ်ႉလႂ် ၸၢင်ႇသႂ်ႇၽႃႇသႃႇၵႂၢမ်းလၢတ်ႈထီႉသွင် (L2) ထီႉသၢမ် (L3) ဢၼ်ဝႃႈၼၼ်ႉ။ ပေႃးမႃးတူၺ်း ပၢႆးၿၺ်ႇၺႃႇ ၶွင်သီႇဢဝ်ၶိုၼ်းၸိုင်ႈတႆး (RCSS - ED) ၼႆၸိုင် လွၵ်းၽႅၼ်ၽႃႇသႃၵႂၢမ်းလၢတ်ႈၶဝ် ၵေႃႈလႆႈႁၼ်မီးဝႆႉလီလီယူႇ။

                        ၽႃႇသႃႇၵႂၢမ်းလၢတ်ႈထီႉၼိုင်ႈ (Mother Language L1) တေပဵၼ်လိၵ်ႈတႆး ၽႃႇသႃႇၵႂၢမ်းလၢတ်ႈထီႉသွင် (Second Language L2) ပဵၼ်ဢၢင်းၵိတ်ႉ ၽႃႇသႃႇၵႂၢမ်းလၢတ်ႈထီႉသၢမ် (L3) သမ်ႉပဵၼ်ထႆးလႄႈ မၢၼ်ႈ ၸၼ်ႉလႂ်တေလႆႈၶဝ်ႈၽႃႇသႃႇသင်ၸိူဝ်းၼႆႉၵေႃႈ လႆႈတမ်းဝၢင်းဝႆႉပႃးမိူၼ်ၵၼ်ယူႇ။ ၵမ်ႉၼမ် ဢဝ်ၽႃႇသႃႇၵႂၢမ်းလၢတ်ႈမႄႈ (MTB/MLE) ပဵၼ်လၵ်းသေသွၼ်ၼၼ်ႉ ပိူၼ်ႈတေၸႂ်ႉဝႆႉမီးတေႃႇထိုင် ထီႉ (5) (L1,L2,L3,L4,L5 / Language 1, Language 2, ....,Language 5) ၸိူဝ်းၼႆႉၵူၺ်း သင်ဝႃႈထိုင် ထီႉ (6)မႃး (L6) မႃး.     ၵမ်ႉၼမ် ပိူၼ်ႈတေ ႁႂ်ႈလုၵ်ႈႁဵၼ်းလိူၵ်ႇဢဝ်သေၽႃႇသႃႇပဵၼ်လၵ်းယဝ်ႉသွၼ်သိုပ်ႇႁဵၼ်း။ 

                        မိူဝ်ႈၵေႃႉလဵၵ်ႉလဵၵ်ႉတေလႆႈ သွၼ်လိၵ်ႈတႆး ၊ လၢတ်ႈၵႂၢမ်းတႆးၼမ်ၼမ် ယွၼ်ႉဝႃႈ ၽႃႇသႃမႄႈႁဝ်းပဵၼ် ၵႂၢမ်းတႆး သင်ထိုင်မႃးၸၼ်ႉၼိုင်ႈ ၽႃႇသႃႇဢၢင်းၵိတ်ႉၸၢင်ႇၶဝ်ႈ သင်ထိုင်ၸၼ်ႉသၢမ်မႃး လိၵ်ႈမၢၼ်ႈ လိၵ်ႈထႆးၸၢင်ႇၶဝ်ႈမႃးၸွမ်းၵၼ်။

• လွၵ်းၽႅၼ်ၽႃႇသႃႇၵႂၢမ်းလၢတ်ႈၵူႈတီႈတီႈပိူၼ်ႈ (Language Progression Plan)

                        ပေႃးမႃးတူၺ်း လွၵ်းလၢႆးသွၼ်ပၼ်လိၵ်ႈလုၵ်ႈဢွၼ်ႇ ၽႃႇသႃႇၵႂၢမ်းလၢတ်ႈ ၸၼ်ႉလႂ်ၸၼ်ႉၼၼ်ႉမိူင်းလႂ်မိူင်းၼၼ်ႉၵေႃႈ မၼ်းၵေႃႈဢမ်ႇမိူၼ်ၵၼ် မၼ်းဢိင်ၼိူဝ်ငဝ်းလၢႆးဝၢၼ်ႈမိူင်းလႂ်ဝၢၼ်ႈမိူင်းၼၼ်ႉ ထႅင်ႈလွင်ႈၼိုင်ႈၵေႃႈ မၼ်းဢိင်ႇၼိူဝ် ႁူဝ်ၵူၼ်းၶူးသွၼ် ၼမ်ဢႄႇလႄႈ ၼမ်ႉၵတ်းၶူးသွၼ်မၼ်း ပႃးထႅင်ႈမိူၼ်ၵၼ်ယူႇ။

                        လွၵ်းၽႅၼ်ၽႃႇသႃႇၵႂၢမ်းလၢတ်ႈပိူၼ်ႈ (Language Progression Plan) တီႈၼႆႈ ၶႃႈတေယွၼ်းပိၼ်ႇဝႃႈ (Language Progression Plan) ၼႆႉ ၸႂ်ႉဝႃႈ လွၵ်းၽႅၼ်ၽႃႇသႃႇၵႂၢမ်းလၢတ်ႈၼႆၵႂႃႇဝႆႉယူႇ  ယွၼ်ႉဝႃႈ မၢင်ၶေႃႈ မၢင်ႁူဝ်ၶေႃႈ ၵႂၢမ်းတႆးႁဝ်း တေဢမ်ႇပေႃးႁၼ်မီး ထႅင်ႈလွင်ႈၼိုင်ႈၵေႃႈ တူဝ်ၶႃႈ ဢမ်ႇမီးၵၢၼ်လူၼ်ႉလႅၼ်လိၵ်ႈတႆးလႄႈ ဝေႃႇႁႃရႃႉၵႂၢမ်းတႆးၵေႃႈပႃးယူႇ။ တီႈၼႆႈၶႃႈမႃးလၢတ်ႈၼႄဝႃႈ လွၵ်းၽႅၼ်ၽႃႇသႃႇၵႂၢမ်းလၢတ်ႈ ၵူႈတီႈတီႈ တၢင်းမူတ်း ၸွမ်းၼင်ႇလႆႈလဵပ်ႈႁဵၼ်းႁူႉဝႆႉ ၼၼ်ႉတေႉ တေမီးယူႇ (4)လွၵ်း ဢၼ်ဢဝ် လွၵ်းလၢႆးၽႃႇသႃႇၵႂၢမ်းလၢတ်ႈမႄႈပဵၼ်လၵ်းသေသွၼ် (MTB/MLE ) ၼႂ်း (4) Graph (4)ႁၢင်ႈၼႆႉပဵၼ် 

1. Simultaneous acquisition
2. Consecutive acquisition
3. Subtractive
4. BI/Trilingualism

• Simultaneous acquisition                        

                        {Simultaneous acquisition - All languages are taught right from the beginning. although may not have equal emphasis}. Simultaneous acquisition ၼႆႉ တွၼ်ႈတႃႇ မိူင်းၸိူဝ်းၶိုၼ်ႈယႂ်ႇ မိူၼ်ၼင်ႇမိူင်းၾိလၢၼ်ႇ (Filand) ၶဝ် မိူင်းသထႄးတေႉၵေႃႈ တေဢမ်ႇပေႃးမီး လွင်ႈပၼ်ႁႃသင်တေႉတေႉ ပေႃးပဵၼ် တွၼ်ႈတႃႇမိူင်းၵွတ်းၽၢၼ်မိူင်းၸၢဝ်းၶိူဝ်းၼမ်တေႉ တေမီးပၼ်ႁႃၵၼ်တၢင်းၼမ်ဝႆႉယူႇ။ လွၵ်းလၢႆးဢဝ် Simultaneous acquisition ၼႆႉသေသွၼ်ၼႆႉ ၶူးသွၼ်မၼ်းတေလႆႈမီးၼမ်ႉၵတ်ႉ ၊ ၶူးသွၼ်ႁူင်းႁဵၼ်းမၼ်းၵေႃႈ တေလႆႈမီးၼမ် ၊ ငိုၼ်းလိူၼ်ၵႃႈၸႂ်ႉၸၢႆႇ ၶူးသွၼ်မၼ်းၵေႃႈ တေယဝ်ႉၼမ်ဝႆႉတေႉတေႉယူႇ။

                        လွၵ်းလၢႆးဢဝ်ၽႃႇသႃႇၵႂၢမ်းလၢတ်ႈမႄႈလႄႈ လၢႆလၢႆမဵဝ်းၶဝ်ႈၸွမ်းၵၼ်မႃး တႄႇတီႈႁူင်းႁဵၼ်းၽၢၵ်ႇ (KG) ထိုင်ၸၼ်ႉ (6) ၼၼ်ႉ မၼ်းဢမ်ႇငၢႆႈ။ တေလႆႈၽိုၵ်းပၼ်ၶူးသွၼ်မၼ်းဝႆႉၵျၢမ်းၵျၢမ်ႈ ႁႂ်ႈၶဝ်ပေႃးပေႉလႆႈၼႂ်းၽႃႇသႃႇတူဝ်ၵဝ်ႇလႄႈ တေလႆႈမီး ၶူးသွၼ်ႁၢင်ႈႁႅၼ်းတူဝ်ႈတၼ်းဝႆႉ ၵူႈၶၢဝ်းပႃးမိူၼ်ၵၼ်။ ပေႃးတူၺ်း လွၵ်းသွၼ် Simultaneous acquisition ၼႆႉတေႉ မၼ်းတေဢမ်ႇပေႃးငၢမ်ၵၼ်တၢင်း မိူင်းတႆးႁဝ်းလႄႈ မိူင်းႁူမ်ႈတုမ်ႇမိူင်းမၢၼ်ႈ တႄႇတီႈႁူင်းႁဵၼ်းၽၢၵ်ႇ (KG) သေၶဝ်ႈ L1,L2,L3 မႃးၵမ်းလဵဝ်။

• Consecutive acquisition

                        {Consecutive acquisition - Second and third languages might be introduced in succession so that students are able to strengthen skills in their L1 before taking on L2 and L3}. လွၵ်းလၢႆးသွၼ်ဢဝ် Consecutive acquisition ၼႆႉသမ်ႉ ၽႃႇသႃႇၵႂၢမ်းလၢတ်ႈထီႉသွင်ၼႆႉ မၼ်းတေၶဝ်ႈမႃးၵမ်းလွႆးလွႆးၵူၺ်း ဢမ်ႇၵိုင်ႉၵၢင်ႉၶဝ်ႈမႃးၸွမ်းၵၼ် ၵမ်းလဵဝ် (3) ၽႃႇသႃႇ မိူၼ်ၼင်ႇ Simultaneous acquisition ၼၼ်ႉ။ ပေႃးမႃးတူၺ်း လုၵ်ႉဢဝ်တီႈၼႂ်းႁူင်းႁဵၼ်းၽၢၵ်ႇ (KG) ထိုင် ၸၼ်ႉ (7) ၼၼ်ႉ ၸၼ်ႉလႂ်ၸၼ်ႉၼၼ်ႉ ၽႃႇသႃႇၵႂၢမ်းလၢတ်ႈထီႉသွင် တေလႆႈၶဝ်ႈၶိင်ႇလႂ် ၶၢဝ်းလႂ်ၼႆ မီးဝႆႉပိူင်မၼ်းၵမ်းလဵဝ်။ ပေႃးမႃးတူၺ်း တီႈႁူင်းႁဵၼ်းၽၢၵ်ႇၼႆႉ ဢဝ်ၽႃႇသႃႇၵႂၢမ်းလၢတ်ႈမႄႈ ၽႃႇသႃႇၵူၼ်းၼႂ်းႁိူၼ်းပဵၼ်လၵ်းသေသွၼ် သင်ထိုင်မႃးၸၼ်ႉၼိုင်ႈယဝ်ႉ ၽႃႇသႃႇၵႂၢမ်းလၢတ်ႈထီႉသွင် (L2) ၸၢင်ႇၶဝ်ႈမႃး။ ၵူၺ်းၽႃႇသႃႇမႄႈတေႉ ၸၼ်ႉမၼ်းသုင်ၶိုၼ်ႈမႃးၵႃႈႁိုဝ်ၵေႃႈ ၶိင်ႇသွၼ်မၼ်း လွၵ်းၶၢဝ်းယၢမ်းမၼ်း တေလူတ်းယွမ်း လူင်းၵႂႃႇၵမ်းဢိတ်းဢိတ်းဝႆႉယူႇ။

                        ၸွမ်းၼင်ႇ ယၢမ်ႈလႆႈလဵပ်ႈႁဵၼ်းႁူႉဝႃႈ လွၵ်းလၢႆး Consecutive acquisition ၼႆႉသေသွၼ်ၼႆႉ တေမီးထႅင်ႈမိူၼ်ၼင်ႇ မိူင်းၾိလိပ်းပိၼ်းၶဝ်ၵေႃး ၸႂ်ႉတိုဝ်းလွၵ်းလၢႆးသွင် ထီႉသွင် Consecutive acquisition ၼႆႉ ၵူၺ်းၼင်ႇၵဝ်ႇ  ယွၼ်ႉပိူဝ်ႈဝႃႈ မိူင်းၾိလိပ်းပိၼ်းၼႆႉၵေႃႈ မီးၸၢဝ်းၶိူဝ်းလၢႆၸၢဝ်းၶိူဝ်း ယူႇႁူမ်ႈႁွမ်းၸွမ်းၵၼ် လႄႈ တွၼ်ႈတႃႇ တေႁဵၼ်းႁူႉဢဝ်လႆႈ ၽႃႇသႃႇၵႂၢမ်းလၢတ်ႈထီႉသွင်လႆႈလီၼၼ်ႉ တေလႆႈလူၼ်ႉလႅၼ်ၵႂၢမ်း လၢတ်ႈၽႃႇသႃႇမႄႈတူဝ်ၵဝ်ႇၵွၼ်ႇၼႆ ၽူႈႁဵတ်းၵၢၼ်ပၢႆးပၺ်ႇၺႃႇၶဝ် ႁူႉပွင်ၸႂ်ဝႆႉလီငမ်းလႄႈ ၸၢင်ႇလႆႈၽွမ်ႉလႆႈၸႂ်ၵၼ်သေၸႂ်ႉတိုဝ်းၸွမ်း။

                        ပေႃးမႃးတူၺ်း ႁၢင်ႈထီႉသွင်ၼႆႉ ယုမ်ယမ်ဝႃႈ မၼ်းၵေႃႈတေငမ်ႈၵၼ်တၢင်း ငဝ်းလၢႆးၽူႈႁဵတ်းၵၢၼ်ပၢႆးပၺ်ႇၺႃႇၼႂ်းၸိုင်ႈတႆးႁဝ်းဝႆႉလၢႆလၢႆၸုမ်းယူႇ လုၵ်ႉဢဝ်တီႈႁူင်းႁဵၼ်းၽၢၵ်ႇ KG1,KG2 ထိုင် ၸၼ်ႉၼိုင်ႈ ဢဝ်ၽႃႇသႃႇၵႂၢမ်းလၢတ်ႈ ၵႂၢမ်းတႆးပဵၼ်လၵ်းသေသွၼ် သင်ထိုင်မႃးၸၼ်ႉသွင် ၽႃႇသႃႇၵႂၢမ်း လၢတ်ႈထီႉသွင် (L2) ၸၢင်ႇၶဝ်ႈမႃး သင်ထိုင်မႃးၸၼ်ႉသၢမ်ယဝ်ႉ ၽႃႇသႃႇၵႂၢမ်းလၢတ်ႈထီႉသၢမ် (L3) ၸၢင်ႇၶဝ်ႈမႃး ႁဵတ်းၼႆၵေႃႈလီမိူၼ်ၵၼ်ယူႇ။

• Subtractive

                        {Subtractive - the learners' mother tongue is used for teaching only in pre primary or early primary grades but then move students into the official school language and out of their MT by mid-primary}. လွၵ်းလၢႆး Subtractive ၼႆႉတေႉ ၵမ်ႉၼမ်လူင်ပွင်ၸိုင်ႈမိူင်းလႂ်မိူင်းၼၼ်ႉ ဢမ်ႇၼၼ် ၽွင်းလူင် ၽၢႆႇပၢႆးပၺ်ႇၺႃႇၶဝ် ၵေႃႉပဵၼ်ၵူၼ်းတမ်းဝၢင်းလူင်းမႃး ပိူင်မၼ်းၵမ်းသိုဝ်ႈလႄႈ တေလႆႈႁဵတ်းသၢင်ႈၸွမ်း လွၵ်းလၢႆး Subtrative ၼႆႉ တေလႆႈဝႃႈပႃးၽၢႆႇၶႂ်ႈဢဝ်ၵူၼ်းၶိူဝ်းပိူၼ်ႈယဵၼ်းပဵၼ်ၶိူဝ်းတူဝ်ၵဝ်ႇၼႆၵေႃႈဝႃႈလႆႈ ဢိတ်းဢိတ်းယူႇ ၼႆႉတေႉယူႇတီႈတၢင်းႁၼ်ထိုင်သုၼ်ႇတူဝ်ၽူႈတႅမ်ႈလိၵ်ႈၵူၺ်း။ လွၵ်းလၢႆး Subtractive ၼႆႉသမ်ႉ လုၵ်ႉဢဝ်တီႈႁူင်းႁဵၼ်းၽၢၵ်ႇမႃး တေႃႇထိုင်ၸၼ်ႉ (7) လႆႈၶဝ်ႈႁဵၼ်းသွၼ်ဢဝ်ၽႃႇသႃႇၵႂၢမ်းလၢတ်ႈ (3) ၽႃႇသႃႇၵမ်းလဵဝ်သေသွၼ် ( L1,L2,L2) သင်ထိုင်မႃးၸၼ်ႉ (3) ဢမ်ႇၼၼ် ထိုင်မႃးၸၼ်ႉ(5) ၽႃႇသႃႇၵႂၢမ်းလၢတ်ႈမႄႈၼၼ်ႉ ထုၵ်ႇလႆႈၺႃးဢဝ်ဢွၵ်ႇၵႂႃႇပႅတ်ႈယူႇ။

                        တူဝ်ယၢင်ႇမၼ်းၸွမ်းၼင်ႇလႆႈလဵပ်ႈႁဵၼ်းႁူႉႁၼ်မႃး လွၵ်းလၢႆးၸႂ်ႉတိုဝ်း Subtractive ၼႆႉ တေပဵၼ်မိူင်းႁိမ်းႁွမ်းႁဝ်း မိူၼ်မိူင်းထႆးၼႆႉယဝ်ႉ။ ယွၼ်ႉပိူဝ်ႈဝႃႈ ၼႂ်းမိူင်းႁူမ်ႈတုမ်ႇမိူင်းမၢၼ်ႈ ၸၢဝ်းၶိူဝ်းၼႂ်းမိူင်း ဢွၼ်ၵၼ်ပႆၢႈဢွၵ်ႇယၢၼ်မိူင်းသေ ၵႂႃႇယူႇမိူင်းထႆးၼမ်တေႉတေႉ မိူၼ်ၼင်ႇ ၸၢဝ်းၶိူဝ်းမၢၼ်ႈ ၵူၼ်းၶိူဝ်းမၢၼ်ႈ ၊ မွၼ်း ၊ ယၢင်း ၊ တႆး ၸိူဝ်းၼႆႉယဝ်ႉ။ ပေႃးမႃးတူၺ်း တီႈၶႃႈယၢမ်ႈလႆႈၵႂႃႇလဵပ်ႈႁဵၼ်း တီႈႁူင်းႁဵၼ်းထႆးၸၼ်ႉၵၢင်လင်ၼိုင်ႈ တီးၵဵင်းမႆႈ လုၵ်ႉဢဝ်တီႈႁူင်းႁဵၼ်းၽၢၵ်ႇထိုင် ၸၼ်ႉ (3) တေႉၶဝ်မီးသုၼ်ႇသွၼ် လၢတ်ႈၽႃႇသႃႇၵႂၢမ်းမႄႈ (Mother Language L1) ၶဝ်  ၵႂၢမ်းယၢင်းၼႆသေတႃႉၵေႃႈ သင်လုၵ်ႈဢွၼ်ႇၼၼ်ႉထိုင်မႃး ၼႂ်းၸၼ်ႉ (4)ၼႆၸိုင် လိၵ်ႈယၢင်း ၵႂၢမ်းယၢင်းၼႆႉ  ဢဝ်ႁၢႆပႅတ်ႈသေ တေလႆႈၸႂ်ႉတိုဝ်း ၽႃႇသႃႇၵႂၢမ်းလၢတ်ႈထီႉသွင် (L2) ၵႂၢမ်းထႆးၼႆႉၼမ်လိူဝ်သေပိူၼ်ႈပႅတ်ႈဝႆႉယူႇ။ ၼႂ်းၼၼ်ႉ ၽႃႇသႃႇၵႂၢမ်းလၢတ်ႈထီႉသၢမ် ၵႂၢမ်းဢၢင်းၵိတ်းၵေႃႈ တေၸၢင်ႈလႆႈၶဝ်ႈမႃးလိူဝ်ၵဝ်ႇလႄႈ တေလႆႈႁဵၼ်းႁူႉဢဝ်ၽၢႆႇထႆးၼမ်လိူဝ်သေပိူၼ်ႈလႄႈ ၵႂၢမ်းဢၢင်းၵိတ်းဢိတ်းဢိတ်းၵႂႃႇယူႇ။

• BI/Trilingualism

                        {BI/Trilingualism - 2nd or 3rd language learned as a subject}. လွၵ်းလၢႆးၸႂ်ႉတိုဝ်း Bi/Trilingualism ၼႆႉတေႉ ၵမ်ႉပႃႇၼမ် ၶႂ်ႈဢဝ်ၽႃႇသႃႇၵႂၢမ်းလၢတ်ႈ တူဝ်ၸဝ်ႈၵဝ်ႇပဵၼ်လၵ်းလၵ်းသေ ၽႃႇသႃႇၵႂၢမ်းလၢတ်ႈတၢင်ႇၸၢဝ်းၶိူဝ်း (L2,L3) တေႉ မီးတေႉမီးယူႇ ၵူၺ်းဢမ်ႇတင်ႈၸႂ်တင်ႈၶေႃးသေ ႁဵတ်းတေႉတေႉၼၼ်ႉယဝ်ႉ။ ဢဝ်ၽႃႇသႃႇၵႂၢမ်းလၢတ်ႈထီႉသွင် ထီႉသၢမ်ပဵၼ်ၵၢၼ်သွၼ် (Subject) လွင်ႈလဵဝ်ၵူၺ်း ဢမ်ႇလႆႈ ၸႂ်ႉဢဝ်ပဵၼ်လၵ်းထီႉသွင်ထီႉသၢမ်တေႉတေႉသေသွၼ်ပၼ် ႁႂ်ႈလုၵ်ႈဢွၼ်ႇပေႃးမီးလွင်ႈ လူၼ်ႉလႅၼ်ႇလႄႈ လၢတ်ႈလႆႈၶႆႈၼႄလႆႈပႃး။

                        လွၵ်းလၢႆးၵၢၼ်သွၼ်ၽႅၼ်ၽႃႇသႃႇ ၵႂၢမ်းလၢတ်ႈ ထီႉ(4)ၼႆႉတေႉ ၸွမ်းၼင်ႇလႆႈလဵပ်ႈႁဵၼ်းႁူႉ မၼ်းၶႂ်ႈငၢႆးငၢႆးမိူၼ်ၵၼ်တၢင်း လၢႆးသွၼ်မိူင်းမၢၼ်ႈဝႆႉယူႇ။ မိူဝ်ႈယူႇႁူင်းႁဵၼ်းၽၢၵ်ႇသမ်ႉ ၸိူဝ်းႁဝ်းပဵၼ် လုၵ်ႈဢွၼ်ႇၸၢဝ်းၶိူဝ်း ပဵၼ်တႆး ၊ ၶၢင်ႇ ၊ မွၼ်း ၊ လႃးႁူ ၊ ဝႃႉ ၵူႈၶိူဝ်းၶိူဝ်း သင်ထိုင်ၵႂႃႇတီႈႁူင်းႁဵၼ်းၽၢၵ်ႇ (KG) ယဝ်ႉၼႆၸိုင် ႁဝ်းၶႃႈၶဝ် ၵမ်ႉၼမ် လႆႈလၢတ်ႈၵပ်ႉသိုပ်ႇၵပ်းသၢၼ်ၵၼ်တၢင်း ၽႃႇသႃႇ ၵႂၢမ်းလၢတ်ႈမႄႈပိူၼ်ႈ ၵႂၢမ်းမၢၼ်ႈပဵၼ်လၵ်းသေသွၼ်လၢတ်ႈ ပေႃးပဵၼ်ၼၼ် တွၼ်ႈတႃႇတႆးႁဝ်း ဢဝ်ပဵၼ် ၽႃႇသႃႇၵႂၢမ်းလၢတ်ႈထီႉသွင် (L2) ၵႂႃႇပႅတ်ႈယဝ်ႉ။ တွၼ်ႈတႃႇ ၵူၼ်းမၢၼ်ႈတေႉ တေဢမ်ႇမီးပၼ်ႁႃၼႂ်းၽႃႇသႃႇၵၢၼ်ႁဵၼ်းၵၢၼ်သွၼ်ၼႆသေတႃႉၵေႃႈ တွၼ်ႈတႃႇၸၢဝ်းၶိူဝ်းတေႉ မီးလွင်ႈယၢပ်ႇၽိုတ်ႇလႄႈ မီးလွင်ႈၶဵင်ႇတႃႉတေႉတေႉ။

                        ပေႃးမႃးတူၺ်း ၽႃႇသႃႇၵႂၢမ်းလၢတ်ႈမႄႈ (Mother Language L1) ႁဝ်းၼႆႉ ပဵၼ်ၵႂၢမ်းတႆး ၽိူဝ်ထိုင်ၵႂႃႇတီႈႁူင်းႁဵၼ်း သမ်ႉလႆႈၵႂႃႇ လၢတ်ႈၵႂၢမ်းမၢၼ်ႈပဵၼ် ၽႃႇသႃႇၵႂၢမ်း လၢတ်ႈထီႉသွင် (L2) ႁဝ်း ပႅတ်ႈ လုၵ်ႈဢွၼ်ႇႁူင်းႁဵၼ်းၽၢၵ်ႇၸၼ်ႉၼိုင်ႈၸိူဝ်းၼႆႉ ၽႃႇသႃႇၵႂၢမ်းလၢတ်ႈမႄႈ (Mother Language L1) ၶဝ် ၵမ်ႉဢမ်ႇပႆႇႁူႉပွင်လီလီသင်တေႉတေႉ သမ်ႉပေႃးလႆႈၵႂႃႇ ႁဵၼ်းလိၵ်ႈၽႃႇသႃႇၵႂၢမ်းလၢတ်ႈထီႉသွင်ပႅတ်ႈၼႆ မၼ်းမီးလွင်ႈယၢပ်ႇႁႅင်းတေႉတေႉ.   ႁဵတ်းၼၼ်သေလိုၼ်းသုတ်း တေႃႇပေႃးယဝ်ႉ ႁူင်းႁဵၼ်းၸၼ်ႉသိပ်း ထိုင်လႆႈၸုမ်မႃး တေႃႇပေႃးယဝ်ႉၸၼ်ႉၸွမ်မႃး ၽႃႇသႃႇၵႂၢမ်းလၢတ်ႈ ထီႉသွင်ၶွင် တွၼ်ႈတႃႇမၢၼ်ႈ ဢၢင်းၵိတ်း (L2, English) ၼၼ်ႉၵေႃႈ ႁဝ်းဢမ်ႇပေႉ ယွၼ်ႉဝႃႈႁဝ်းဢမ်ႇပႆႇလူၼ်ႉလႅၼ်မႃးၽႃႇသႃႇၵႂၢမ်းလၢတ်ႈမႄႈတူဝ်ၵဝ်ႇလီလီလႄႈ မၼ်းၵေႃႈယၢပ်ႇတွၼ်ႈတႃႇႁဝ်း ၽႃႇသႃႇထီႉသွင် (L2) ၵႂၢမ်းလၢတ်ႈၽၢႆႇမၢၼ်ႈၵေႃႈႁဝ်းဢဝ်ဢမ်ႇပေႉ မေႃၼိုင်ႈမဵဝ်းၼိုင်ႈဢိတ်းႁဵတ်းၼၼ်ၵႂႃႇသေ ၸူပ်းယဝ်ႉႁူင်းႁဵၼ်းမႃး။ ယုမ်ႇယမ်ႈဝႃႈ ၸိူဝ်းဢၼ်ယဝ်ႉႁူင်းႁဵၼ်းလူင်ပွင်ၸိုင်ႈမၢၼ်ႈမႃးၼၼ်ႉၵမ်ႉၼမ် တႄႇၸၼ်ႉၼိုင်ႈထိုင်ၸၼ်ႉသိပ်း တေႃႇပေႃးယဝ်ႉၸၼ်ႉၸွမ် ၽႃႇသႃႇဢၢင်းၵိတ်းၼႆႉ ပႃးၵူႈၸၼ်ႉၸၼ်ႉယဝ်ႉ ၵူၺ်းဢမ်ႇတေႃႇသူႈမီးၽႂ်မေႃလၢတ်ႈၵႂၢမ်းဢၢင်းၵိတ်းလႄႈ လူၼ်ႉလႅၼ် လိူဝ်သေ ပေႃးဢမ်ႇဢဝ်ၶၢဝ်းယၢမ်းလိူဝ်လိူဝ်သေ သွၼ်ဢဝ်တၢင်းၼွၵ်ႈၶိုၼ်းထႅင်ႈ ပႃးတၢင်းတူဝ်ၶႃႈၶဝ်ၵေႃႉၼိုင်ႈယူႇ။
                        လွၵ်းလၢႆးသွၼ်ၽႅၼ်ၵၢၼ်ၽႃႇသႃႇၵႂၢမ်းလၢတ်ႈ (Language Progression Plan) ၼႆႉ  သင်ဝႃႈ ၽူႈမီးပၺ်ႇၺႃႇၸုမ်းတႆးႁဝ်း ဢမ်ႇဝႃႈ ပဵၼ်ၸုမ်းလႂ်ၵေႃႈလီ ဝူၼ်ႉဝႆႉဝႃႈ တေၸႂ်ႉတိုဝ်းလွၵ်းလၢႆး MTB/MLE ဢမ်ႇၼၼ် ယိူင်းဢၢၼ်းဝႆႉ တႃႇတေတႅမ်ႈပပ်ႉၵၢၼ်ႁဵၼ်းၵၢၼ်သွၼ်မႂ်ႇၼႆၸိုင်ႈ ၸွင်ႇမၼ်းသမ်ႉတေမႃးငၢမ် တၢင်းႁဝ်းႁႃႉ ယဝ်ႉၵေႃႈ ၸွင်ႇမၼ်းတေမႅၼ်ႈၸွမ်းၼင်ႇလွၵ်းလၢႆးပိူင်တမ်းဝႆႉ MTB/MLE ယူႇႁႃႉၼႆသေ ႁႂ်ႈ ဢဝ်ပဵၼ်ပိုၼ်ႉႁူႉလႄႈ ၶေႃႈမုၼ်း တွၼ်ႈတႃႇ ၽူႈႁဵတ်းၵၢၼ်ပၢႆးပၺ်ႇၺႃႇႁဝ်းၶႃႈၵႂႃႇယူႇ။

                        ယၢမ်းလဵဝ် ပၢႆးပၺ်ႇၺႃႇ ၸၢဝ်းၶိူဝ်း ပၢႆးပၺ်ႇၺႃႇၵူႈတီႈတီႈ ပိူၼ်ႈဢွၼ်ၵၼ်ဝူၼ်ႉလႄႈ ၼပ်ႉသွၼ်ႇ သူၼ်ၸႂ်မႃး လွၵ်းလၢႆးၵၢၼ်ႁဵၼ်းၵၢၼ်သွၼ်  MTB/MLE ၼႆႉမႃးၼမ်တေႉတေႉဝႆႉယူႇ။ ဢမ်ႇၸႂ်ႈဝႃႈ ယွင်ႇၸွမ်း မိူင်းဝၼ်းတူၵ်း ဢမ်ႇၸႂ်ႈဝႃႈ ၵႃႈၸွမ်းလင်ပိူၼ် ၵၢၼ်ပၢႆးပၺ်ႇၺႃႇ တႆးႁဝ်း တွၼ်ႈတႃႇတေၶိုတ်း ၸၼ်ႉ ၸွမ်းပၢၼ်ပိူၼ်ႈလႆႈၼၼ်ႉ ၵႃႈလႆႈလဵပ်ႈႁဵၼ်းတူၺ်း လၢႆလၢႆၽၢႆႇလၢႆလၢႆတၢင်းသေ ႁဵတ်းသၢင်ႈၵႂႃႇယူႇ။ ၽူႈႁဵတ်းၵၢၼ်ပၢႆးပၺ်ႇၺႃႇ ၶူးသွၼ် ၽူႈၵွၼ်းႁူင်းႁဵၼ်းၸိူဝ်းၼႆႉ တေလႆႈမီးၵၢၼ်လဵပ်ႈႁဵၼ်းၵူႈၶၢဝ်းယၢမ်းလႄႈ မီးၵၢၼ်ၶဝ်ႈဢွၵ်ႇ ႁဵၼ်းႁူႉလွင်ႈ လွၵ်းလၢႆးသွၼ်ပၼ် ပူၵ်းပွင်ပၼ်လုၵ်ႈဢွၼ်ႇၼေႃႇတႅၼ်းၶိူဝ်းႁဝ်းၵူႈမဵဝ်းမဵဝ်းဝႆႉပႃးၽွင်ႈယူႇ။

                    

• သႅင်သိုၵ်း
• www.saisengserk.com

Share:

Read More

ၸႂ်ႉတိုဝ်းလွၵ်းလၢႆးၵၢၼ်သွၼ် VARK

                        ၵၢၼ်ပဵၼ်ၶူးသွၼ်ၼိုင်ႈၵေႃႉၼႆႉ မၼ်းဢမ်ႇငၢႆႈတေႉတေႉယဝ်ႉ ၶူးသွၼ်လႄႈ ၵၢၼ်လဵပ်ႈႁဵၼ်းၼႆႉ မၼ်းတေႉၶၢတ်ႇၵၼ်ဢမ်ႇလႆႈ လုၵ်ႈႁဵၼ်းလႄႈ ၵၢၼ်ႁဵၼ်းၵေႃႈ တေၶၢတ်ႇၵၼ် ဢမ်ႇလႆႈမိူၼ်ၵၼ်။ ယွၼ်ႉၼၼ် ပေႃးမႃးတူၺ်း ယၢမ်းလဵဝ်ၼႆႉ ၼႂ်းမိူင်းတႆးႁဝ်း ႁႃၶူးသွၼ်တႃႇမႃးသွၼ်လိၵ်ႈပၼ် ၵူၼ်းၼုမ်ႇတႆးႁဝ်းၵေႃႈယၢပ်ႇမႃးၵူႈဝၼ်းဝၼ်း။ ယွၼ်ႉၵၢၼ်သုၼ်ႇတူဝ်လႄႈ ၵၢၼ်ငိုၼ်းလိူၼ်ဢမ်ႇလႆႈၼမ်ၵေႃႈမဵဝ်းၼိုင်ႈ ၊ ယွၼ်ႉပဵၼ်ၶူးသွၼ်လႄႈ လႆႈထူပ်းၺႃးလွင်ႈသုၵ်ႉၸႂ် (Subject Pressure) ၵေႃႈမဵဝ်းၼိုင်ႈ ၊ ၵၢၼ်သုၼ်ႇတူဝ်ၵၢၼ်ႁႃငိုၼ်းတွင်းၵေႃႈဢမ်ႇမီးၵေႃႈတၢင်းၼိုင်ႈ ထႅင်ႈလွင်ႈၼိုင်ႈ ၵေႃႈ တႃႇတေမႃးပူၵ်းပွင်ပၼ် ၵူၼ်းၼုမ်ႇႁဝ်းၶၢဝ်းတၢင်းၼႃႈၼႆႉ ၶူးသွၼ် ဢၼ်ပဵၼ်ၼၢင်းယိင်းၵေႃႈၶႂ်ႈႁႃ ယၢပ်ႇမႃးတိၵ်းတိၵ်းလႄႈ လႆႈႁၼ်ၶူးသွၼ်ၵမ်ႉၼမ်တႃႇလဵဝ် ပဵၼ်ၵူၼ်းၸၢႆးၼမ်မႃးၵေႃႈတၢင်းၼိုင်ႈ။

                        ၵၢၼ်ပဵၼ်ၶူးသွၼ်ၼႆႉ မေႃလိၵ်ႈတႆး ၊ လႆႈၸုမ်ႈၶူးပွႆႉလူင်မႃး ၊ မေႃလၢတ်ႈၵႂၢမ်းၽႃႇသႃလၢႆ ၽႃႇသႃႇ ၊ မေႃႁူႈလိၵ်ႈလၢႆးလၢႆလၢႆၶိူဝ်းၵူၺ်းၵေႃႈ မၼ်းဢမ်ႇယဝ်ႉ  တွၼ်ႈတႃႇ တေၶဝ်ႈမႃးပဵၼ်ၶူးသွၼ်လႄႈ ႁူႉပွင်ႇၸႂ် လွၵ်ႈလၢႆးသွၼ်လုၵ်ႈဢွၼ်ႇၼၼ်ႉ တေလႆႈၶိုၼ်ႈပၢင်သွၼ် ပၢင်ၽိုၵ်းၽွၼ်ႉ (Teacher Training) လႄႈ ႁူႉလွင်ႈလုၵ်ႈဢွၼ်ႇလီလီၵွၼ်ႇ ၸၢင်ႇတေယိပ်းၵုမ်းၵမ်ၸတ်းၵၢၼ်သွၼ် ႁွင်ႈႁဵၼ်းတူဝ်ၵဝ်ႇလႆႈလီလီ။ ပေႃးမေႃသွၼ်ၸွမ်းပပ်ႉ ပေႃးမေႃသွၼ်ၸွမ်းၼႂ်းမၢင်ၸႄႈ မေႃသွၼ်ၸွမ်း ဢၼ်တၢင်းၼိူဝ်ပၼ်လူင်းမႃးၵူၺ်းတေႉ လုၵ်ႈဢွၼ်ႇၵေႃႈတေဢမ်ႇထွမ်ႇၵႂၢမ်းၶူးမၼ်း ၼမ်ႉၵတ်ႉ ၵၢၼ်ဝူၼ်ႉၶူင်ႈသၢင်ႈ လုၵ်ႈဢွၼ်ႇၵေႃႈတေဢမ်ႇမီးလွင်ႈႁူၼ်ႈမုၼ်းၶိုၼ်ႈယႂ်ႇမႃး။ လွၵ်းလၢႆးၵၢၼ် သွၼ်ယၢမ်းလဵဝ်ၼႆႉ ၵူႈမိူင်းမိူင်းပိူၼ်ႈပေႃးၵႂႃႇႁွတ်ႈထိုင် ႁူဝ်ပၢၵ်ႇ 21 ယဝ်ႉ ႁဝ်းတေႉတိုၵ်ႉမီးယူႇ ႁူဝ်ပၢၵ်ႇ 20 လႄႈ တေၶဝ်ႈဢမ်ႇၶဝ်ႈၼႂ်းႁူဝ်ပၢၵ်ႇ 20 ၵေႃႈတၢင်းတိုၵ်ႉလႆႈႁၼ်မီးယူႇ။

                    ယၢမ်းလဵဝ်ၼႆႉ ပိူၼ်ႈတေဢဝ်လုၵ်ႈဢွၼ်ႇပဵၼ်သူၼ်ၵၢင် (Student Center) သေသွၼ် ဢမ်ႇၸႂ်ႈဝႃႈ ဢဝ်ၶူးသွၼ်မၼ်းပဵၼ်လၵ်း (Teacher Center) သေသွၼ်မဵဝ်းလဵဝ်ယဝ်ႉ။ မိူဝ်ႈႁဝ်းပဵၼ် လုၵ်ႈဢွၼ်ႇႁဵၼ်းၼၼ်ႉ တေႉၶူးသွၼ်မၼ်းၸႂ်ႉႁဵတ်းသင်ၵေႃႈလႆႈႁဵတ်း ၶူးသွၼ်မၼ်းႁဵတ်းသင်ၵေႃႈဢမ်ႇၽိတ်း ၽႂ်လိူဝ်ၵႂၢမ်းၶူးသွၼ် ၸိူဝ်းပဵၼ်လုၵ်ႈႁဵၼ်းၸိူဝ်းၼၼ်ႉသမ်ႉပဵၼ်ၵူၼ်းၽိတ်းၵူၺ်း။ ပေႃးၶူးသွၼ်မၼ်းၶဝ်ႈမႃးၼႂ်းႁွင်ႈႁဵၼ်း တေဢမ်ႇလႆႈလၢတ်ႈၵႂၢမ်းၼမ် တေဢမ်ႇလႆႈထၢမ်ႇၼမ် ၶူးသွၼ်မၼ်းတႅမ်ႈသင်ၼိူဝ်ပႅတ်ႇပုၼ်း (White boad) ၊ ၶူးသွၼ်မၼ်းၸႂ်ႉတႅမ်ႈၸွမ်းလင်ၵေႃႈ လႆႈႁဵတ်းၸွမ်းတႅမ်ႈၸွမ်းၵူၺ်း။ ပေႃးသွၼ်ယဝ်ႉယဝ်ၵေႃႈ မိူဝ်ႈၽုၵ်ႈတေလႆႈတွပ်ႇ သင်တွပ်ႇဢမ်ႇလႆႈ ၵျိၢၵ်ႇဢလွတ်ႈဢုမ်ႇသူပ်းမႃးဢမ်ႇလႆႈ ၺႃးၵိၼ်ၶွၼ်ႉ ႁဵတ်းၼၼ်သေ ႁဝ်းလႆႈၽၢၼ်ပူၼ်ႉမႃးၵၼ် လိုၼ်းသုတ်း ၶၢဝ်းတၢင်း 12 ပီႊ ဢၼ်တွင်းလႆႈမၼ်းလႄႈ ဢၼ်မႃးၸႂ်ႉတိုဝ်းလႆႈၼႂ်း ၸၢတ်ႈပၢၼ်ၽဝႁဝ်းလႆႈတေႉတေႉၼၼ်ႉ ဢမ်ႇလႆႈႁၼ်မီးသင်တေႉတေႉ။

                        ဝၼ်းမိူဝ်ႈၼႆႉ သင်ႁဝ်းလႆႈၶဝ်ႈမႃးႁၢပ်ႇပဵၼ်ၶူးသွၼ်လိၵ်ႈ လုၵ်ႈဢွၼ်ႇတႆးႁဝ်းယဝ်ႉၼႆၸိုင်ႁဝ်းတေလႆႈႁူႉလွၵ်းလၢႆးသွၼ်ပၼ်လုၵ်ႈဢွၼ်ႇ ႁႂ်ႈၶဝ်ၸွမ်းလႆႈလိၵ်ႈလီလႄႈ ႁဵၼ်းႁူႉလႆႈလီလီ ယိူင်းဢၢၼ်းထိုင် တွၼ်ႈတႃႇၶူးမၼ်းၵေႃႈ ႁႂ်ႈမီးၵၢၼ်သွၼ်လိၵ်ႈပၼ်လုၵ်ႈဢွၼ်ႇလႆႈလီလီလႄႈ ႁႂ်ႈႁူႉလွၵ်းလၢႆးမၼ်း ဢိၵ်ႇပႃးႁႂ်ႈမီးပႃးလွင်ႈယုမ်ႇယမ်ၼိူဝ်တူဝ်ၸဝ်ႈၵဝ်ႇ (Self Confidence) ၶိုၼ်ႈမႃးလႆႈၼမ်ၼမ်ၼႆႉ တေမႃးၵပ်းသိုပ်ႇ ၼႄပၼ် လွၵ်းလၢႆးၵၢၼ်သွၼ်လိၵ်ႈပၼ်လုၵ်ႈဢွၼ်ႇ ဝီႇဢႄႇၶေႇထီႇ (VARK) ၵႂႃႇယူႇ။

• ႁဵၼ်းႁူႉ ႁၼ်ၸႅင်ႈလႅင်းလီ (Visual)
• ႁဵၼ်းႁူႉဢဝ် တၢင်းၵၢၼ်ငိၼ်းထွမ်ႇၸႅင်ႈလီ (Auditory) 
• ႁဵၼ်းႁူႉဢဝ် တၢင်းပႆတူင်ႉၼိုင်လႆႈဢဝ် (Kinesthethic)
• ႁဵၼ်းႁူႉဢဝ် တုမ်ႉတႅမ်ႈလႄႈ ဢၢၼ်ႇ (Tactile/Write)

                        လွၵ်းလၢႆးသွၼ်လုၵ်ႈဢွၼ်ႇႁဵၼ်း ႁႂ်ႈႁဵၼ်းႁူႉလႆႈဝႆးလီၼႆႉ ၵမ်ႉၼမ်ပိူၼ်ႈဢဝ်ၵၼ် ယွမ်းႁပ်ႉဝႃႈ လွၵ်းဝီႇဢေႇဢႃႇၶေႇ (VARK) ၼႆႉ ၸႂ်ႉလႆႈလီ တီႈသုတ်းၼႆပႃးယူႇ။ တွၼ်ႈတႃႇ လုၵ်ႈဢွၼ်ႇတေႁဵၼ်းလႆႈလီ ႁပ်ႉႁူႉၸႅင်ႈလႅင်းလႆႈလီလႄႈ တေႁဵၼ်းႁူႉထႅင်ႈ ၽႃႇသႃမႂ်ႇမႂ်ႇထီႉသွင် (Second Language) ၼႆၸိုင် သင်ၶူးႁဝ်းၶႃႈၶဝ် ပေႃႈမႄႈလုၵ်ႈဢွၼ်ႇလႄႈ ၽူႈႁၢပ်ႇၵၢၼ် ၼႂ်းပၢႆးပၺ်ႇၺႃႇႁဝ်းၶႃႈၶဝ် ၸႂ်ႉလွၵ်းၼႆႉ တေၶႅမ်ႉတိူမ်းလိူဝ်ၵဝ်ႇယူႇ။

• ႁဵၼ်းႁူႉ ႁၼ်ၸႅင်ႈလႅင်းလီ (Visual)

                        တႃႇလုၵ်ႈဢွၼ်ႇတေႁဵၼ်းႁူႉ လႆႈလီလီၼၼ်ႉ ႁဝ်းတေၵိုၵ်ႉၵၢင်ႉသွၼ်ၸွမ်းၼႂ်းပပ်ႉ သွၼ်ပၼ်လိၵ်ႈၼမ်ၼမ် ႁႂ်ႈၶဝ်လူလိၵ်ႈၼမ်ၼမ်လႄႈ ဢၢၼ်ႇၼမ်ၼမ်ၼႆၸိုင် လုၵ်ႈဢွၼ်ႇတေၶၢၼ်ႉလႄႈ တေဢမ်ႇသူၼ်ၸႂ် လွၵ်းလၢႆးသွၼ် ႁၼ်ၸႅင်ႈလႅင်းလီ (Visual) ဢၼ်ဝႃႈၼႆႉ မၼ်းပဵၼ် တၢင်းလိၵ်ႈလႄႈ တၢင်းႁၢင်ႈ မဵဝ်းဢၼ်လုၵ်ႈဢွၼ်ႇႁၼ်လႆႈၵမ်းလဵဝ်ၼၼ်ႉ  မႃးသွၼ်ၸွမ်းၵၼ်ၼၼ်ႉယဝ်ႉ။

                        တူဝ်ယၢင်ႇမၼ်း သင်ႁဝ်းသွၼ်လုၵ်ႈဢွၼ်ႇဝႃႈမႃ (Dog) မႃၼႆႉမၼ်းပဵၼ်ၸိူင်ႉႁိုဝ် ပဵၼ်သၢတ်းႁႃႉ ပဵၼ်ၶူဝ်းၶွင် ဢမ်ႇၼၼ် ပဵၼ်မဵဝ်းမီးသၢႆၸႂ်ႁႃႉ ဢမ်ႇၼၼ် ပဵၼ်မဵဝ်းယူႇၼႂ်းၼမ်ႉၼႆ ႁဝ်းတေလႆႈဢဝ်ႁၢင်ႈ (Picture) ဢမ်ႇၼၼ် ဢၼ်ႁၼ်လႆႈတူဝ် တေႉမၼ်းၼၼ်ႉမႃးၼႄလုၵ်ႈဢွၼ်ႇ ၼႆႉပိူၼ်ႈႁဝ်းဝႃႈ သွၼ်လိၵ်ႈ ဢဝ်တူဝ်လိၵ်ႈလႄႈ ႁၢင်ႈမဵဝ်းဢၼ်ႁၼ်လႆႈ မႃးသွၼ်ၸွမ်းၵမ်းလဵဝ် ( Visual Teaching) ၼႆယဝ်ႉ။ လွၵ်းလၢႆး သွၼ်လုၵ်ႈဢွၼ်ႇၼႆႉ လၢတ်ႈပဵၼ်သဵင် လၢတ်ႈပဵၼ်ၵႂၢမ်း လၢတ်ႈပဵၼ်လိၵ်ႈမဵဝ်းလဵဝ်ၵူၺ်းဢမ်ႇလႆႈ တေလႆႈဢဝ်ႁၢင်ႈၾၢင်ႈ ၼႄၵမ်ႉၼမ်ယဝ်ႉ။ လုၵ်ႈဢွၼ်ႇ KG - G3 ၸိူဝ်းၼႆႉ ၶဝ်ၵျိုၵ်ႈပပ်ႉမဵဝ်းမီးႁၢင်ႈၼမ်လိူဝ်သေ တူၼ်ႈထႅဝ်လႄႈ လိၵ်ႈၼမ်ၼၼ်ႉယဝ်ႉ။ ပေႃးသွၼ်ပၢႆးၼပ်ႉသမ်ႉ လူဝ်ႇတူၺ်းဝႃႈ လုၵ်ႈဢွၼ်ႇၶဝ်လဵၼ်ႈ ၵျိုၵ်ႈသင်ၼႂ်းႁွင်ႈႁဵၼ်း တူဝ်ယၢင်မၼ်း သင်လုၵ်ႈဢွၼ်ႇၶဝ် ဢဝ်မၢၵ်ႇႁိၼ်သေလဵၼ်ႈပဵၼ် မၢၵ်ႇၵဵပ်း ၼႆၸိုင် ႁဝ်းၵေႃႈ ဢဝ်မၢၵ်ႇၵဵပ်း မၢၵ်ႇႁိၼ်ၶဝ် ၼၼ်ႉႁဵတ်းပဵၼ်ၵၢၼ်သွၼ် ပၢႆးၼပ်ႉသေ ၼပ်ႉဢၢၼ်ႇ လေႃးထွၼ်ႇၵူတ်း လႆႈလၢႆလၢႆးလၢႆးယူႇ။ 

ထႅင်ႈလွင်ႈၼိုင်ႈ တႃႇလုၵ်ႈဢွၼ်ႇပေႃးတေမီးလွင်ႈၵျေႃႇသိူဝ်း မီးလွင်ႈသိူဝ်းၸႂ်ၵႂႃႇၼႂ်းၽႃႇသႃႇၵၢၼ်သွၼ်တူဝ်ၸဝ်ႈၵဝ်ႇႁဝ်းလႆႈလီၼၼ်ႉၵေႃႈ  ၼႂ်းၵၢၼ်သွၼ်လုၵ်ႈဢွၼ်ႇၼႆႉ ႁဝ်းလူဝ်ႇဢဝ်ၵၢၼ်တူင်ႉၼိုင် မႃးၵွႆႉၵၢႆႇ ၵၼ်တၢင်း ႁူဝ်ၶေႃႈၽႃႇသႃၵၢၼ်သွၼ် ၸဝ်ႈၵဝ်ႇၼၼ်ႉသေ ႁဵတ်းတူင်ႉၼိုင်လႄႈ သွၼ်ၵေႃးလႆႈပႃးမိူၼ်ၵၼ်ယူႇ ပေႃးႁဵတ်းၼၼ် လုၵ်ႈဢွၼ်ႇၼႆႉ မၼ်းတေဢမ်ႇၶၢၼ်ႉသွၼ်လိၵ်ႈ လိၵ်ႈၵေႃႈလႆႈ ၾၢင်ႈႁၢင်ႈၵေႃႈႁၼ် လဵၼ်ႈၵေႃႈလႆႈလဵၼ်ႈ ၵဵပ်းၵေႃႈၵဵပ်းလႆႈပႃး ၽႃႇသႃႇတူဝ်ၸဝ်ႈၵဝ်ႇ ဢၼ်ၶႂ်ႈသွၼ်ပၼ်ၶဝ် ဢၼ်ၶႂ်ႈႁႂ်ႈၶဝ်လႆႈၼၼ်ႉပႃးမိူၼ် ၵၼ်ၵႂႃႇ လိုၼ်းသုတ်းပၢႆးတူဝ် (Physical) လုၵ်ႈဢွၼ်ႇၵေႃႈ တေမီးလွင်ႈၶႅမ်ႉလႅပ်ႈလီၶိုၼ်ႈမႃးလိူဝ်ၵဝ်ႇ။

• ႁဵၼ်းႁူႉဢဝ်တၢင်းၵၢၼ်ငိၼ်းထွမ်ႇ (Auditory)

                        လွၵ်းလၢႆးၵၢၼ်ႁဵၼ်းႁူႉဢဝ် လွင်ႈထွမ်ႇငိၼ်းဢဝ်ၼႆႉၵေႃႈ လွင်ႈယႂ်ႇတေႉတေႉ တေႃႇၼင်ႇလုၵ်ႈဢွၼ်ႇၸိူဝ်းပဵၼ် ဢၢင်ႇၵႃႇတူဝ်ၶိင်းဢမ်ႇတဵမ်ထူၼ်ႈ (Disability) မိူၼ်ၼင်ႇ လုၵ်ႈဢွၼ်ႇၵိူတ်ႇမႃးဢမ်ႇႁၼ်တႃ တႃဢမ်ႇလီၸိူဝ်းၼႆႉ တႃႇၶဝ်တေသွၼ်ႁဵၼ်းလႆႈလိၵ်ႈ လႆႈလီလီၼၼ်ႉ ၶဝ်ၵူၺ်းလႆႈဢဝ် ႁူထွမ်ႇငိၼ်းပဵၼ်လၵ်းသေ သွၼ်ဢဝ်ႁဵၼ်းဢဝ်ၵႂႃႇလႆႈၵူၺ်း။

                        ပေႃးၶဝ်လႆႈငိၼ်း လႆႈထွမ်ႇငိၼ်းတီႈပိူၼ်ႈလၢတ်ႈၵူၺ်း ၶဝ်တႅမ်ႈၸွမ်းလႆႈ ပွင်ၸႂ်လႆႈၵမ်းလဵဝ် လွင်ႈၵၢၼ်ထွမ်ႇသဵင်ၼႆႉၵေႃႈ လမ်လွင်ႈ လွင်ႈယႂ်ႇမိူၼ်ၵၼ်ယူႇ။ မိူၼ်ၼင် ႁဝ်းတေႁဵၼ်းၽႃႇသႃၵႂၢမ်းလၢတ်ႈ ၽႃႇသႃထီႉသွင် (Second Languages) ထႅင်ႈၼႆႉ လၵ်းလၵ်းမၼ်း ႁဝ်းတေလႆႈထွမ်ႇၼမ်ၼမ် ထွမ်ႇႁႂ်ႈဢိမ်ဢိမ်လႄႈ ႁႂ်ႈၵႆႉၵႆႉလႆႈငိၼ်းၵွၼ်ႇ ပေႃးၵၢၼ်ႁပ်ႉထွမ်ႇႁဝ်းတဵမ်ထူၼ်ႈမႃးလႆႈလီယဝ်ႉ ၵၢၼ်လၢတ်ႈႁဝ်းၸၢင်ႇ လၢတ်ႈဢွၵ်ႇမႃးလႆႈလီၵႂႃႇ။ လုၵ်ႈဢွၼ်ႇႁဵၼ်းႁဝ်း ၵေႃႈမိူၼ်ၵၼ်ယဝ်ႉ ပေႃးႁဝ်းႁူႉဝႃႈၶဝ် ဝႃႈယၢပ်ႇ ႁၢႆႉ တိုဝ် ၼႆၸိုင် ႁဝ်းတေၵႆႉၵႆႉလႆႈလၢတ်ႈၶဝ်ၼမ်ၼမ် ၵႂၢမ်းဢၼ်ႁဝ်း ၶႂ်ႈလၢတ်ႈ ၶႂ်ႈသင်ႇသွၼ်ၶဝ်ၼၼ်ႉ ႁဝ်းတေၵႆႉၵႆႉလၢတ်ႈပၼ်ၶဝ် ႁႂ်ႈလႆႈထွမ်ႇ လိုၼ်းသုတ်းမႃးၶဝ် ၵေႃႈတေမိူၼ်ၼင်ႇၸႂ်ႁဝ်းမႃး။ 

                        ၵၢၼ်သွၼ်ႁဵၼ်းလိၵ်ႈၵေႃႈ မိူၼ်ၵၼ် ႁဝ်းတေလႆႈသွၼ်တၢင်းလၢတ်ႈ တၢင်းတူင်ႉၼိုင်ၼႄပႃးၶဝ် ၽႃႇသႃၵႂၢမ်းလၢတ်ႈ တီႈလုၵ်ႈဢွၼ်ႇၶဝ်ဢမ်ႇႁူႉသေႁဵၼ်းလႆႈလီမႃး ၽႃႇသႃဢၼ်တူဝ်ၸဝ်ႈၵဝ်ႇသွၼ် လုၵ်ႈဢွၼ်ႇဢမ်ႇယၢမ်ႈငိၼ်း ဢမ်ႇယၢမ်ႈႁူႉသေပွၵ်ႈသေ တေလႆႈမႃးၸိူဝ်းၼႆႉ ႁဝ်းတေလႆႈ လၢတ်ႈလႄႈ ႁဵတ်းၼႄတူင်ႇယၢင်ႇမၼ်းပႃး။

တူဝ်ယၢင်မၼ်း ပေႃးႁဝ်းသွၼ်လုၵ်ႈဢွၼ်ႇၸၼ်ႉ (4)လႄႈ (5) ၽႃႇသႃႇၵႂၢမ်း ဢၢင်းၵိတ်းၼႆႉ ႁဝ်းတေလႆႈလၢတ်ႈ တေလႆႈၼႄပႃးႁၢင်ႈမၼ်းပႃး လၢတ်ႈၼမ်ၼမ် ႁဵတ်းၼႄတူဝ်ယၢင်မၼ်းပၼ်ၼႄၼမ်ၼမ် မိူၼ်ၼင်ႇ Stand Up ႁဝ်းၵေႃႉပဵၼ်ၶူးသွၼ်တေလႆႈ လုၵ်ႉၼႄၶဝ် ယဝ်ႉ Sit Down ယဝ်ႉၵေႃႈ တေလႆႈၼင်ႈၼႄၶဝ် Jump Right and Jump Left ၸိူဝ်းၼႆႉ ႁဝ်းတေလႆႈ ဢွၼ်လုၵ်ႈဢွၼ်ႇ လဵၼ်ႈလႄႈ ၵျွၵ်ႉသၢႆႉၵျွၵ်ႉၶႂၢင်ႇ ၼႄၶဝ် တၢင်းလဵၼ်ႈ တၢင်းလၢတ်ႈ တၢင်းႁဵတ်း လိုၼ်းသုတ်းလုၵ်ႈဢွၼ်ႇၶဝ်ၵေႃႈ လႆႈၵႂႃႇၸွမ်း ၼႂ်းၽႃႇသႃႇၵၢၼ်သွၼ်ႁဝ်းၵမ်းလဵဝ်ယူႇ။

• ႁဵၼ်းႁူႉဢဝ်တုမ်ႉတႅမ်ႈလႄႈ ဢၢၼ်ႇ (Tactile/Reading/Writing)

                        ၵၢၼ်ႁဵၼ်းႁူႉ လုၵ်ႈဢွၼ်ႇႁဵၼ်းၼႆႉ ယူႇတီႈၶူးသွၼ်မၼ်းႁူႉလွၵ်းလၢႆးသွၼ် ႁူႉလွၵ်းလၢႆး တႃႇတေႁႂ်ႈလုၵ်ႈဢွၼ်ႇ သူၼ်ၸႂ် ၶဝ်ႈၸႂ်မႃးၼႂ်းၽႃႇသႃႇတူဝ်ၸဝ်ႈၵဝ်ႇၵူၺ်းဢမ်ႇယဝ်ႉ တေလႆႈသွၼ်ပၼ်လုၵ်ႈဢွၼ်ႇလႄႈ ႁႂ်ႈလုၵ်ႈဢွၼ်ႇၶဝ်မေႃဝူၼ်ႉ မေႃႁူႉလွင်ႈၽိတ်းလွင်ႈထုၵ်ႇ လူဝ်ႇသွၼ်ႁႂ်ႈလုၵ်ႈဢွၼ်ႇၶႂ်ႈႁဵၼ်းႁူႉဢဝ်ယူႇသေႇသေႇ တူဝ်ယၢင်ႇမၼ်းသွၼ်ယဝ်ႉႁူဝ်ၶေႃႈၼိုင်ႈယဝ်ႉ ထိုင်တီႈၶၢဝ်းယၢမ်း ၵၢၼ်သွၼ်မူတ်းၵႂႃႇယဝ်ႉလႄႈ လုၵ်ႈဢွၼ်ႇတိုၵ်ႉၶႂ်ႈသိုပ်ႇသွၼ် ၶႂ်ႈႁဵၼ်းႁူႉထႅင်ႈၼၼ်ႉယူႇသေႇသေႇယဝ်ႉ။

                         ၵၢၼ်သွၼ်လိၵ်ႈလုၵ်ႈဢွၼ်ႇဢၼ်ဝႃႈၼႆႉ လူဝ်ႇႁႂ်ႈမၼ်းမိူၼ်ၼင်ႇ ၵူၼ်းတူၺ်းၸိူဝ်း မိူၼ်ပိူၼ်ႈတူၺ်းၸိူဝ်း ၵူဝ်းလီးယႃးလႄႈ ၸိူဝ်းၶႄႇ ၸိူဝ်းၼႆႉယူႇ တူၺ်းယဝ်ႉမၢႆ 12 ထိုင်တီႈ ပေႃးၶႂ်ႈသိုပ်ႇတူၺ်းထႅင်ႈ ပႂ်ႉမုင်ႈမွင်းၶႂ်ႈတူၺ်းထႅင်ႈ မၢႆ 13 ၼၼ်ႉယူႇ ၵၢၼ်သွၼ်လိၵ်ႈ တွၼ်ႈလႂ်တွၼ်ႈၼၼ်ႉ ၵၼ်လႂ်ၵၼ်ၼၼ်ႉ သွၼ်ၵႂႃႇ ယဝ်ႉၵေႃႈ တွၼ်ႈတႃႇလုၵ်ႈဢွၼ်ႇ ၶႂ်ႈႁဵၼ်းႁူႉထႅင်ႈမႂ်ႇမႂ်ႇၼၼ်ႉ ႁဝ်းတေလႆႈႁဵတ်းဝႆႉပၼ်ၼႂ်း လွၵ်းၽႅၼ်ၽႃႇသႃ ၵၢၼ်သွၼ်ႁဝ်းၼၼ်ႉယူႇ။ ၽႃႇသႃၵၢၼ်သွၼ် ဢၼ်ႁဝ်းသွၼ် ဢၼ်ႁဝ်းပၼ်ၵၢၼ်ႁိူၼ်းလုၵ်ႈဢွၼ်ႇ ဢမ်ႇၼၼ် ဢၼ်ႁူဝ်ၶေႃႈတူဝ်ၸဝ်ႈၵဝ်ႇ သွၼ်ပၼ်လုၵ်ႈဢွၼ်ႇမိူဝ်ႈၼႆႉၵေႃႈ တေလႆႈမီးၵၢၼ်ၵွႆႉၵၢႆၵၼ်တၢင်း ပပ်ႉၼႂ်းႁူင်းတူၺ်းလိၵ်ႈပႃးမိူၼ်ၵၼ်ယူႇ။ သင်ႁဝ်းၶႂ်ႈၽိုၵ်းႁႂ်ႈလုၵ်ႈဢွၼ်ႇ မေႃတႅမ်ႈ မေႃဢၢၼ်ႇလီလီၼႆၸိုင် ႁဝ်းတေလႆႈ မီးႁူင်းတူၺ်းလိၵ်ႈပၼ် ဝႆႉတီႈလုၵ်ႈဢွၼ်ႇထႅင်ႈ။

                        လုၵ်ႈဢွၼ်ႇၼႆႉ ပေႃးႁဝ်းဢမ်ႇၽိုၵ်းႁႂ်ႈၶဝ်တႅမ်ႈလိၵ်ႈ လူဢၢၼ်ႇလိၵ်ႈမႃးၸဵမ်မိူဝ်ႈလဵၵ်ႉၼႆၸိုင် ပေႃးၵေႃႉယႂ်ႇမႃးယဝ်ႉ ၸၢင်ႇလၢတ်ႈဝႃႈ လုၵ်ႈႁဵၼ်းၶဝ် ဢွၼ်ၵၼ်ၶဝ်ႈႁူင်းတူၺ်းလိၵ်ႈ ဢွၼ်ၵၼ်ၶဝ်ႈဢၢၼ်ႇ လိၵ်ႈၼႆဢမ်ႇလႆႈ မၼ်းတေလႆႈၽိုၵ်းလႄႈ သွၼ်ပၼ်ၶဝ်ဝႆႉ ၸဵမ်မိူဝ်ႈလဵၵ်ႉလဵၵ်ႉၼၼ်ႉယဝ်ႉ။

ၼႂ်းႁွင်ႈတူၺ်းလိၵ်ႈၵေႃႈ ၽူႈမီးပုၼ်ႈၽွၼ်း ၽူႈၵွၼ်းႁူင်းႁဵၼ်း ၽူႈၸတ်းၵၢၼ်ႁူင်းႁဵၼ်းၶဝ် တေလႆႈတမ်းဝၢင်းဝႆႉပပ်ႉမဵဝ်းဢၼ်ၵဵဝ်ႇၶွင်လုၵ်ႈဢွၼ်ႇႁဵၼ်း ၸၼ်ႉလႂ်ၸၼ်ႉၼၼ်ႉလႄႈ ဢႃႇယုလႂ်ဢႃႇယုၼၼ်ႉပႃးမိူၼ်ၵၼ်ယူႇ။ လုၵ်ႈဢွၼ်ႇႁူင်းႁဵၼ်းၽၢၵ်ႇထိုင် ၸၼ်ႉ 4 ၸိူဝ်းၼႆႉ ၵမ်ႉၼမ်ၶဝ်တေၵျိုၵ်ႈတူၺ်းႁၢင်ႈလႄႈ ဢၢၼ်ႇဢဝ်ၵူၺ်း ၶဝ်ဢမ်ႇပႆႇမေႃလႄႈ ဢၢၼ်ႇလိၵ်ႈၼမ်ၼမ်ၵမ်းလဵဝ် ၶဝ်ဢမ်ႇပႆႇႁပ်ႉ။ ယွၼ်ႉၼၼ် ပပ်ႉတွၼ်ႈတႃႇလုၵ်ႈဢွၼ်ႇလူႇဢၢၼ်ႇၼႆႉ မိူၼ်ၼင်ႇၵႃႇတုၼ်း (Cartoon) ဢပုမ်ႇ (Story) ၸိူဝ်းၼႆႉ တေလႆႈဝႆႉ ပၼ်ၼမ်ၼမ်။ လုၵ်ႈဢွၼ်ႇၼႆႉ လုၵ်ႉတီႈၶဝ်တူၺ်းပပ်ႉ လူဢၢၼ်ႇပပ်ႉသေ သင်ၶဝ်ႁၼ်သေလွင်ႈလွင်ႈ ဢၼ်လီသူၼ်ၸႂ်ၼႂ်းပပ်ႉ ၼၼ်ႉယဝ်ႉၼႆၸိုင် လွင်ႈၼွၼ်းၾၼ်ၶဝ်လႄႈ လွင်ႈၶဝ်ၶႂ်ႈပဵၼ် ၶႂ်ႈႁဵတ်းၶႂ်ႈသၢင်ႈၵေႃႈ တေ ပေႃႇဢွၵ်ႇမႃးတီႈၼၼ်ယဝ်ႉ။

• ႁဵၼ်းႁူႉဢဝ်တၢင်းပႆတူင်ႉၼိုင်လႆႈဢဝ် (Kinesthetic)

                        လွၵ်းလၢႆးသွၼ် ပႆတူင်ႉၼိုင်ဢဝ်ၼႆႉ မၼ်းတေလႆႈမီးၵၢၼ်တူင်ႉၼိုင်ၼမ်ၼမ် ဢဝ်လဵၼ်ႈပဵၼ် Game သေသွၼ် လွၵ်းၼႆႉ မၼ်းပဵၼ် လွၵ်းတွၼ်ႈတႃႇ လုၵ်ႈဢွၼ်ႇၸိူဝ်း ဢမ်ႇၸွမ်းလႆႈလိၵ်ႈ ဢမ်ႇၶိုတ်းလႆႈလိၵ်ႈ ပေႃးဢဝ်ၵႂၢမ်းတႆးႁဝ်းလၢတ်ႈၵၼ်သိုဝ်ႈသိုဝ်ႈၵေႃႈ ပဵၼ်လွၵ်းလၢႆးတွၼ်ႈတႃႇ သွၼ်လုၵ်ႈဢွၼ်ႇဢၼ် ဢွၵ်းၶႂ်ႈထိူင်ႉၼၼ်ႉဢိတ်းဢိတ်းၼႆၵေႃႈဝႃႈလႆႈယူႇ။

                        လုၵ်ႈဢွၼ်ႇမၢင်ၵေႃႉၼႆႉ ၵမ်ႉၼမ်ၶဝ် တေဢွၼ်ၵၼ်ၶၢၼ်ႉသွၼ်လိၵ်ႈ ၽႃႇသႃပၢႆးၼပ်ႉ ယွၼ်ႉမၼ်းလႆႈ ၼပ်ႉသွၼ်ၼမ်လႄႈ လႆႈဝူၼ်ႉၼမ် လႆႈၸႂ်ႉဢွၵ်းဢေႃႈၼမ် မၢင်ၵေႃႉဢမ်ႇဝူၼ်ႉၸွမ်းလႆႈ ဢမ်ႇသွၼ်ႇၸွမ်းလႆႈလႄႈ ဢဝ်ဢွၵ်ႇတေႃးသၵေႃႈယၢမ်ႈႁၼ်မႃးမိူၼ်ၵၼ်ယူႇ။ ပေႃးၸိူင်ႉၼၼ် တွၼ်ႈတႃႇၶဝ် တေႁဵၼ်းႁူႉဢဝ်လႆႈလီၼၼ်ႉ ႁဝ်းတေလႆႈလဵပ်ႈႁဵၼ်း တီႈၼႂ်းတူဝ်လုၵ်ႈဢွၼ်ႇၶဝ်ၼၼ်ႉလႆႈလီလီဝႃႈ ၶဝ်ၵျိုၵ်ႈလဵၼ်ႈသင် ၶဝ်ၵျိုၵ်ႈႁဵတ်းသင်ၼႆသေ ဢဝ်ဢၼ်ၶဝ်ၵျိုၵ်ႈ ဢဝ်ဢၼ်ၶဝ်လႆႈၸႂ်ၼၼ်ႉ မႃးႁဵတ်းပဵၼ် ၵၢၼ်သွၼ်ႁဝ်းလႄႈ ႁႂ်ႈမၼ်းၵွႆႉၵႆႇၵၼ်ပဵတ် ၽႃႇသႃၵၢၼ်သွၼ်ၵႂႃႇၵေႃႈလႆႈမိူၼ်ၵၼ်ယူႇ။ 

                        လုၵ်ႈဢွၼ်ႇမၢင်ၵေႃႉၼႆႉ 4 လေႃး 4 လႆႈၵႃႈႁိုဝ် 7 လေႃး 7 လေႃးၵၼ်လႆႈၵႃႈႁိုဝ်ၸိူဝ်းၼႆႉ ၶဝ်ဢမ်ႇတွပ်ႇလႆႈ ဢဝ်တိၼ်ဢဝ်မိုဝ်းၶဝ်ယုၵ်ႉသေ သွၼ်ဝူၼ်ႉသွၼ်ၵေႃႈဢမ်ႇလႆႈ။ ၵူၺ်းလုၵ်ႈဢွၼ်ႇမၢင်ၵေႃႉသမ်ႉၶဵၼ်ၼပ်ႉသွၼ် ထွၼ်ႇလေႃး ၵုတ်း တူဝ်မႄႈလိၵ်ႈၵူပ်ႉ (Even Numbers) ပေႃးပဵၼ်တူဝ်မႄႈလိၵ်ႈ ၵိင်ႈ (Primer Numbers) သမ်ႉ ဢွၵ်းၶဝ်ႁဵတ်းၵၢၼ်ထိူင်းလႄႈ ၼၢၼ်းလႆႈၶေႃႈတွပ်ႇ လိုၼ်းသုတ်း ဢမ်ႇတွပ်ႇသင်လႆႈၵေႃႈမီး. ယွၼ်ႉၼၼ် ပေႃးပဵၼ်ၼၼ် ႁဝ်းတေလႆႈၸႂ်ႉတိုဝ်း လွၵ်းလၢႆးသွၼ်ပႆတူင်ႉၼိုင် (Kinesthetic) ၼႆႉ ဢဝ်။ ၵၢၼ်သွၼ်လႄႈ တၢင်းႁူႉမၢင်လွင်ႈၼႆႉ မၼ်းတေလႆႈ ဢဝ်ၼိူဝ်ႉ ဢဝ်မိုဝ်း ဢဝ်တိၼ်ႇ ဢဝ်တႃ ဢဝ်ႁူ ဢဝ်ဢၢႆ ဢဝ်လိၼ်ႉ ဢဝ်သူပ်းလႄႈ လဵပ်ႈႁဵၼ်းဢဝ်ၵေႃႈမီး ယွၼ်ႉၼၼ် ၵၢၼ်သွၼ်ဢဝ်ႁဵၼ်းႁူႉဢၼ်ဝႃႈၼၼ်ႉ မၼ်းမီးလွၵ်းလၢႆးမၼ်း ၽႆၢႇလႂ်ၽၢႆႇၼၼ်ႉ မၢင်လွင်ႈ ဢၼ်ႁဝ်းႁဵတ်းၼၼ်ႉ လိူဝ်ဝႃႈ ႁဝ်းဢမ်ႇႁူႉဝႃႈ ပဵၼ်လွၵ်းလၢႆးႁဵၼ်းဢဝ်သင်ၼႆၼၼ်ႉၵူၺ်း။

                        လွၵ်းလၢႆးသွၼ်လိၵ်ႈ ဝီႊဢႄႇဢႃႇၶႄႇ (VARK = Visual , Auditory, Tactile/Reading/Writing and Kinesthetic) ၸိူဝ်းၼႆႉ တွၼ်ႈတႃႇ ၶူးသွၼ်ၵူႈၵေႃႉ ထုၵ်ႇလီႁူႉဝႆႉ လွၵ်းလၢႆးသွၼ်မၼ်း ၊ လွၵ်းလၢႆး တွၼ်ႈတႃႇၽႃႇသႃႇၵၢၼ်သွၼ်တူဝ်ၸဝ်ႈၵဝ်ႇ ဢမ်ႇၼၼ် တွၼ်ႈတႃႇ တေႁဵၼ်းႁူႉဝႆႉၶေႃႈမုၼ်းလႆႈလီလီဝႃႈ လုၵ်ႈဢွၼ်ႇဢႃႇယုၶၢဝ်းလႂ်ၶၢဝ်းၼၼ်ႉ ၸၼ်ႉလႂ်ၸၼ်ႉၼၼ်ႉ ၶဝ်ၵျိုၵ်ႈၵိၼ်သင် ၶဝ်ၵျိုၵ်ႈႁဵတ်းသင်ၼႆၵႃႈၼၼ်ႉၵူၺ်း ႁူႉလွၵ်းလၢႆးသွၼ်လိၵ်ႈ ဝီႊဢႄႇဢႃႇၶႄႇ လီယဝ်ႉၵေႃႈ တွၼ်ႈတႃႇၶူးသွၼ်မၼ်း တေမေႃ ဢဝ်ၵႂႃႇၸႂ်ႉတိုဝ်း ၼႂ်းႁွင်ႈႁဵၼ်းၵေႃႈ လူဝ်ႇမီးပၢင်ၽိုၵ်းၽွၼ်ႉ ပၢင်သွၼ်ထႅင်ႈပႃးမိူၼ်ၵၼ်ယူႇ ယွၼ်ႉဝႃႈ ႁူႉလွင်ႈ တီႇဢူဝ်ႇလီ (Theory) မၼ်းလွင်ႈလဵဝ်ၵူၺ်းဢမ်ႇလႆႈ လွၵ်းလၢႆး (Methodology) မၼ်းၵေႃႈ တေလႆႈႁူႉပႃး မိူၼ်ၵၼ်ယူႇ။

• သႅင်သိုၵ်း
• www.saisengserk.com

Share:

Read More